餐廳快速搜尋
五月花港台日料理 
五月花港台日料理
地址 荃灣德海街18號富利達中心1樓
電話 2615-0616
菜式 日本 日式西餐廳 自助餐 壽司魚生
人均消費 HKD100以下


6.2
味道 3
服務 3
環境 3.3
價錢 3
1
0
0
簡介 主打港台日料理任食放題,共180多款美食。
營業時間 星期一至日:11:30am-11:00pm
付款方法 信用卡, 現金 | 10% 服務費
招牌菜 一口牛柳  
相關食訊
教會掃場之夜 (飲食情報 / 02/11/2010)
星級食家「山區麵包王」:依間嘢長期晌飲食雜誌賣廣告,時下最流行嘅分時段定額收費放題,仲標明係港台日料理,一個價錢食均三個地方嘅嘢,絕對係個賣點,不過睇番食評,好壞參半,所以一直令小弟卻步未有幫襯... [詳情]
相關食評
30/10/2010
  • 美極煎大蝦,蝦隻本身...
    美極煎大蝦,蝦隻本身又好肉,煎得入晒味。
  • 一口炸豆腐,外皮炸得...
    一口炸豆腐,外皮炸得甘脆入口熱辣辣,裡面嘅豆腐仍然好嫩。
  • 刺身:三文魚、甜蝦、...
    刺身:三文魚、甜蝦、赤貝同墨魚片。
  • 南瓜天婦羅,南瓜粉甜...
    南瓜天婦羅,南瓜粉甜,脆漿薄!
  • 清酒骨湯煮大蜆,蜆多...
    清酒骨湯煮大蜆,蜆多肉厚,又嗒出隱約嘅酒味。
依間嘢長期晌飲食雜誌賣廣告,時下最流行嘅分時段定額收費放題,仲標明係港台日料理,一個價錢食均三個地方嘅嘢,絕對係個賣點,不過睇番食評,好壞參半,所以一直令小弟卻步未有幫襯,但係,今勻教會搞嘅活動,一大棚人,晏晝去完馬灣公園,傍晚哩掃場,點都要鼎力參與吓!再者,若果自己星期六晚(6:00pm入座)哩食,要$149一位兼另加一,依家教會搞凈收$100位,差唔多打咗個六折,更加要支持啦。唔係講笑,成個場130個位,我估都有包咗2/3個場,都幾墟冚!
 
唔知係咪諗住我哋都算叫大客,5:30pm大軍繼續殺上去,本應6:00pm先開始可以叫嘢食,但上到坐低就已經俾我哋點嘢,仲有,任飲方面都係主要得汽水、熱茶、青蘋果綠茶同熱菜蜜,侍應二話不說枱枱擺定一大盆汽水,等我哋盡情咁飲之餘,佢哋都做少啲功夫,飲其他嘢就當然要另點啦。此外,服務都好快手,有求必應咁滯,不過,出食物多少都有走漏,幸好情況唔多。
 
講明港台日料理,都無花無假,仲過百款嘢食,算得上包羅萬有,以日式款式最多,港式其次,台式就比較少!不過啲點菜紙無寫明邊啲係港式、台式定日式,因為大部份睇個名都大概會知,點菜紙就以食物類別哩分:刺身、壽司、手卷、反卷、拉麵、飯類、小食、沙律、揚物(炸嘢)、燒物、火鍋生料、一品料理(種類最雜,有港式小炒、有台式小食、又有日式料理)、甜品,望落都確係幾豐富。
 
港式
- 店鋪有提供一人一鍋形式嘅打鞭爐,不過,大家都嫌烚吓烚吓又耐又麻煩,同埋見啲食物都唔覺有咩特別(16款肉類生料,15款菜類生料),所以無叫。
- 小炒類就點咗幾款,因為同枱有啲大年紀嘅想食番中式嘢,冬菇扒時蔬、欖菜四季豆、美整煎大蝦,估唔到後兩者好食喎。欖菜四季豆,欖菜鹹香惹味,四季豆甘甜;美極煎大蝦,美極鮮醬油提升咗鮮蝦嘅鮮香味,蝦隻本身又好肉,煎得入晒味。不過人少唔好叫小炒,因為份量偏多,我哋依枱有成8個人,每人分少少可以繼續試多啲嘢。
 
台式
- 選擇較少,亦唔多台灣嘅特色小食,感覺台式食物一環弱啲,所以費事嘥料我哋精揀幾款心水嘢食。
- 卒之揀咗台北路邊田螺、一口炸豆腐、台式皮蛋凍豆腐。前者唔多掂,無乜味,有少少沙而且多吉殼;反而兩款豆腐確係唔錯喎,一熱一冷都咁出色,一口炸豆腐雖則寫一口,但一磚都幾大條,分兩啖食啦,因為外皮炸得甘脆入口熱辣辣,裡面嘅豆腐仍然好嫩;而台式皮蛋凍豆腐,輕巧小食,不過要撥開雲霧先見青天,豆腐之上放咗好多青瓜絲,跟住皮蛋放最面,凍豆腐超滑,點少少醬油提提豆味!
 
日式
- 絕對係主打,因為除咗有近7乘嘢屬和食外,款式多之餘,日本嘢感覺始終俾人覺得係貴價啲。
- 先哩味咐小食、沙律類先,海老沙律、蟹籽沙律、螺肉、八爪魚。質素普普通通,作為餐前開胃菜,一試無妨。
- 再試魚生,因為我依枱嘅人唔太好生嘢,所以點得唔多,只叫咗三文魚、甜蝦、赤貝同墨魚片,感覺都幾新鮮,好似甜蝦咁,唔係好大隻,都有鮮蝦甜味。此外,仲有八爪魚、吞拿魚、鯛魚刺身揀,試得過!
- 輪到壽司、壽司卷,前前後後都點咗幾輪,盡量樣樣都試吓,不過又實在好多選擇唔會試得晒。要應付大量需求,廚房只好大量生產密密做,所以,壽司嘅賣相好一般,飯粒比較捏得實,同埋經常一夾赤貝還赤貝,壽司飯還飯,兩者散開晒。至於味道都OK,始終啲用料都唔太差。仲有叫咗幾款反卷,唔係好得,好似加州反卷咁,中間無乜料,啲飯又係硬硬實實,外面層蟹籽就鋪得最「求期」,叫做有就算。
- 又試埋揚物、燒物,依兩瓣都一樣多嘢揀,分別有9款揚物同8款燒物,我哋點嘅有天婦羅(海老、蕃薯、南瓜、軟殼蟹)、脆炸餃子、七味雞軟骨、鹽燒雞翼串、鹽燒鯖花魚、鹽燒秋刀魚。依類別師傅做得唔錯,尤其天婦羅值得一讚,脆漿薄,蝦大隻又有蝦味,小弟個人就已經另外追加4隻海老天婦羅;蕃薯、南瓜都好甜。脆炸餃子、七味雞軟骨就一般啲。至於燒物幾款都好食,我就稍為鍾意個鹽燒鯖花魚,細細件賣相好睇,加少少檸檬汁提味,效果好唔錯!
- 追加啲一品料理同粥飯麵類,分別點咗清酒骨湯煮大蜆、七味三文魚腩、日式肥牛拉麵、吉列炸蝦拉麵。前兩者唔錯,清酒骨湯煮大蜆不單蜆多肉厚,又嗒出隱約嘅酒味;七味三文魚腩,無花無假兩大件三文魚腩香煎,加七味粉,比辣椒粉香,但就無咁辣。粥飯麵類一共有14款供應,粥飯太飽肚,所以揀咗拉麵:日式肥牛拉麵、吉列炸蝦拉麵,一客細細碗,算係一人份量,當然我哋都係「分甘同味」,人人試少少,但肥牛實在好肥,吉列炸蝦就正好多,拉麵叫OK啦,不過湯底無乜味。
 
甜品
飲品頭段都寫過有咩飲,至於甜品都叫有得揀,但就普通嘢:雪米糍、桂花糕、紅豆涼粉,食咗上面咁多嘢,點到留番少少位食甜品,不過,真係三樣都極之普通,雪米糍係維記,得雲喱拿味;桂花糕個樣就怪怪哋,質感都一樣怪怪哋;係個紅豆涼粉似番啲樣。結論,甜品一環可以放棄!
 
其實依個教會價真係抵食到爛,不過你話俾番正價都可以考慮吓,整體質素屬中間位高少少,始終有唔少嘢都好食,但同時亦有啲質素未達標,唯一好處係一個地方食三處唔同地方嘢,一班朋友又好,一家大細老嫩又好,都可以各取其所!
 


推介菜式 美整煎大蝦, 一口炸豆腐, 台式皮蛋凍豆腐, 天婦羅, 清酒骨湯煮大蜆
用餐日期 14/08/2010
時段 晚餐
用餐埸合 家庭聚會 , 三五知己
是次消費 HKD$ 100
食家評分
味道
服務
環境
價錢
地圖
  附近街景
U Lifestyle | Travel | HK | Beauty | Food | Know