今季 Ice cream話題新貴包括最近人氣爆紅的台灣芒果雪糕及雪花冰、 由New York興到返香港嘅「雪糕炸包文治」，以及曼谷翟道翟市場「椰子雪糕」。
寶島愛文芒
這店開業才 2 年，其芒果雪糕同雪花冰就做了台北人龍店第一位，兼長踞台灣搵食網站「愛評網」人氣 no.1，仲係台北米芝蓮唯一冰品小店同 NBA 名人林書豪至愛。舖頭用嚟整雪糕雪花冰係寶島名物愛文芒，甜度達 12-15 度，名氣拍得住日本水果。呢度用嘅係店主舅舅台南農場所產的，盛夏收割後以冰鮮高檔海產的技術、以 -40°c 冷藏以保鮮供全年使用，由果肉、雪糕到雪花冰都係台灣做好再運來香港，保證 100% 台味。香港店才開了約 2 個月，最旺時段甚至等足 45 分鐘。
金牌情人 $58（2 人用）
愛文芒沒有呂宋芒那份死甜，酸味甚少，仲有淡淡的清新果香，用來做雪糕質地頗為 creamy，但保留到愛文芒的清新香味；雪花冰挺身夠芒果味，入口即融，唔會似無味嘅冰，圍邊仲有芒果肉。
招牌情人 $58（2 人用）
雪花冰換上「挫冰」，即刨冰，再淋上台灣總店製的黑糖，糖味清新又不會嗆喉，配芒果雪糕吃也不錯。
甜蜜夾心 $68（配黑糖醬）
窩夫即叫即製，裏面夾了自家打的鮮忌廉及芒果雪糕。
戀愛層層疊 $98
多士挖空後，中間的麵包切粒再以蜜糖焗，配香滑的芒果雪糕。
MangoChaCha
地址：尖沙咀漆咸道南 33-35 號友聯大廈地下 5 號舖（轉入赫德道）
電話：2723 2777
男友速遞 雪糕BAO
Bao 刈包真係由 New York 興到返香港，其實仲有一款甜食嘅「雪糕炸包文治」係受歡迎黑馬。皆因好多貼心暖男明知雪糕會融，都怕怕羞羞問老闆娘 Wendy 可唔可以外賣。以精密的邏輯推論，睇怕都係啲男仔為嗜甜嘅女朋友仔作愛の人肉速遞。外面是香口脆炸的刈包，裏面是凍冰冰的雪糕，食落忽冷忽熱似足要氹嘅女朋友。
雪糕炸包文治 $38 件
刈包即叫即炸，熱辣辣的包子放上雪糕，雪糕質地剛好；包子約 3mm 厚，口感像炸脆了的銀絲卷，嚼感不俗，呍呢嗱雪糕偏甜但配包子又剛好，冰火二重奏。
Bao Wow
地址：灣仔大王東街 28 號
電話：2528 9505
翟道翟 椰壳雪糕
當曼谷係後花園嘅港人，一定食過翟道翟市場裏的椰子雪糕，此椰子雪糕只應曼谷有，陣清新嘅椰子味係曼谷獨有，而家返到香港一樣有得食，因為 1 個月前，港人姚小姐引進香港，用咗 3 年時間打動翟道翟市場裏的雪糕檔，直接飛啲椰子雪糕過嚟，仲跟足晒食法，半殼椰皇有柯打才挖肉再加自選配料，涼浸浸好清新。
招牌椰子雪糕 $25 球（連 1 款配料，另加配料每款 $3）
雪糕質感同喺泰國翟道翟市場食到嘅好似，口感像雪葩但又有雪糕的幼滑，椰子味清新，店員會挖起椰殼上的果肉，食法跟足泰國。每杯更奉道一小杯椰皇水，建議食完雪糕先飲，咪搶咗個雪糕味。
Chatuchak Coconut Icecream
地址：太子水渠道 30-32A 地下 3 號舖
(原文摘自《U Magazine》、文：sieg、圖：Kam、Lamlam、Ki)
