軟雪糕大晒！

軟雪糕紅過劉華，街上總見到有大量途人一杯在手，而家仲要誇張到買杯軟雪糕都要征服50人的人龍，人氣到咁無理由唔講吓，一於2014人氣和話題之作都講，一齊開心舔舔軟雪糕。

雪糕吹海風
Inital 的眼淚味雪糕唔再出，但創意軟雪糕依然有市，這間 Froyo 店就出咗呢杯雪糕，因為夏天幾乎等如陽光海灘，於是店主就諗出這杯「海洋味」雪糕來。海嗰朕味以 7 份新鮮乳酪與 3 份本地高鈣低脂鮮奶做基調，再加少少海鹽調扮海水鹹味，再用天然藍桔汁為雪糕添淡淡的淺藍色襯返個主題，吃時加少少幻想，好有沙灘 feel 呀！
海洋の風乳酪甜筒 $19 杯（連一款 topping）
味道像加強版的益力多，酸味頗醒神，但最特別是帶少少鹹味，唔膩又滑溜，好快隊完一杯。
The Fru:yo Factory
地址：九龍灣牛頭角道 77 號淘大商場三期地下 G281 鋪

朱古力有地企
GODIVA Chocolate Soft Serve $45 杯
雖然出咗差唔多一年，但杯雪糕依然係 instagram 洗版必影。雪糕朱古力味超濃、口感也比日本的軟雪糕實在，每杯仲會配朱古力醬同一塊朱古力，威化筒邊又有朱古力脆脆，滑溜濃郁。
Godiva Chocolatier
地址：銅鑼灣軒尼斯道 555 號崇光百貨地庫二層

kawaii wasabi雪糕
青芥末鹽味雪糕　$18杯
加了 wasabi 鹽的呍呢嗱雪糕，入口先鹹，接着會嘗到淡淡的 wasabi 辛辣，再而是甜甜的呍呢嗱甜味，要讚 wasabi 辣味唔攻鼻，搞鬼。

咖哩多多好味
咖喱海鹽雪糕 $18 杯
與沖繩著名鹽主題店「塩屋」合作，東京 Sky Tree 都有分店。這杯軟雪糕是 100% 跟足「塩屋」的 recipe 製，雪糕是呍呢嗱口味，加上品牌的鹽製，最特別係吃時再加咖喱口味鹽，似吃甜甜的日本咖喱，幾得意。

香辣唐辛子
唐辛子芝麻海鹽雪糕 $18 杯
呢款都特別，另加的唐辛子芝麻鹽裏的黑白芝麻很脆，芝麻味很濃郁，軟滑的軟雪糕配脆脆的芝麻，原來很對勁，少少唐辛子的辣味也和呍呢嗱味無違和感。

白苦瓜之味
白苦瓜海鹽雪糕 $18 杯
眾多款「塩屋」雪糕裏最好味是這款，白苦瓜鹽原來鹹味甚低，仲帶少許甘甜味，加到呍呢嗱雪糕裏，又食到呍呢嗱和牛奶味，又食到白苦瓜鹽甘香。
日和号壽司料理
地址：九龍灣宏照道 38 號 Megabox 10 樓 5 號舖
＊圖中日和号4款軟雪糕所加的調味鹽分量純為拍攝效果而設，正確食法應加少許即可。

社交網絡第一名
紅豆抹茶牛奶雪糕芭菲 $48
長期佔據住 instagram、facebook 及微博洗版第一位，最特別抹茶牛奶雪糕可配大量華麗配料，如日本傳統甜品「餡蜜」，包括紅豆、寒天、糯米糍、蜜柑、沖繩黑糖同脆米，和味無窮好多囡囡冧。
Via Tokyo Japanese Dessert Cafe
地址：銅鑼灣禮頓道 106-126 號禮信大廈地下 1A-1B 號舖

抹茶No.1
宇治抹茶威化筒 $32
這間舖的海港城分店長期排隊，經常排到 40、50 人，日賣 1,000 杯。用京都空運來的宇治抹茶加北海道 3.6 奶製，抹茶味既甘又濃，仲有份茶葉的新鮮味但又不失奶香，軟雪糕空氣感佳。
Sweet House Cha Cha
地址：銅鑼灣勿地臣街 1 號時代廣場 B1 city'super

(原文摘自《U Magazine》、文：sieg、圖：Kam、Lamlam、Ki)