有啲嘢，收得密實都唔等如無見花嘅一日，意識係咪好 dark 呢？我知㗎啦，雖然啱啱踏入咗七月節，係寫食稿唔係寫鬼故，寫呢個開頭都係要介紹變種窩夫登場。
嚴格嚟講，呢舊嘢叫 Waffill，而唔係 waffle，唔係普通窩夫嚟，係 waffle + filling，有餡㗎，係窩夫裏面的新物種，好值得研究。原來，呢款新嘢嘅生理結構都好特別，母系係 Brussel waffle，即係我哋平日見到一格格方方正正嗰種，父系則源自美國的漢堡同英國三文治，經過 DNA 全面改造就變成而家咁樣，佢仲要係全球首現，震撼咗窩夫界。
套劇演到呢度，嗰個始作俑嘅瘋狂科學家應該登場，圖中同我搶食、gel 到個頭賭神嘅就係發明 waffill 嘅 Joeri。佢係 100% 純種嘅比利時人，雖然着晒便服咋，但身份一啲都唔簡單。佢 19 歲就空運到港，3 年後就做咗萬豪國際（Marriott Group）全球最年輕行政總廚，絕對有料到。後生仔特別多諗頭，畀佢諗出有餡嘅窩夫，當然佢會開行大廚嘅 turbo，將窩夫整到有咁講究得咁講究。
有餡嘅係鹹食窩夫，啲餡有泰式鮮蝦、印式雞肉、手撕豬肉同墨西哥辣味牛肉，仲有一款為素食人士而設嘅雜菜，全部都係 Joeri 親手設計 recipe，每件都係即叫即放入餡料再烘，都幾墜手㗎，真係好似食個飯咁飽。仲有一款 Brekki都勁有創意㗎，就係喺窩夫粉漿裏面加咗煙肉脆，配糖粉同 Maple syrup 食，好鬼有 Canadian feel。
真心推仲有傳統的甜食窩夫，咬落去脆卜卜到「咔」一聲，脆到似法國 mille feuille，蛋香超濃郁，加埋凍冰冰雪糕同甜甜嘅糖粉，肥妹都想食多客，一於 encore先。
Brussels waffle premium $68 件
The Prawn Waffill $52 件
Brussels all day Brekki $35 件
有餡窩夫就係用呢個特別設計盒嘅紙盒載住，邊行邊食都唔會搞到一身都係。
Waffills
地址：銅鑼灣禮頓道 124 號地下
電話：2613 9600
營業時間：11am-11pm
(原文摘自《U Magazine》ISSUE 453、文：小儀、圖：Lamlam)
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
