若然你帶點野性基因，汽水、蔬果汁同咖啡你梗係會嫌太過正氣，happy Friday 想做壞小孩，點可以少咗酒精？枝裝酒，我當然唔會仲叫你飲手工啤紅白酒咁流？今次要介紹大家飲最新潮的入樽 Cocktail。
這系列雞尾酒係孖人廚房 Caleb 及 Joshua 嘅新作，本來是設計嚟配佢哋新店嘅 pancake，但其實又可以獨立飲。雞尾酒用樽上，唔係代替酒杯咁簡單，而係因為 Joshua 嫌平時飲 cocktail 愈飲愈唔凍，仲要畀冰沖淡晒，於是索性當港式樽仔奶茶做，先手搖調味繼而入樽冷藏最少 6 小時，令枝枝 cocktail 奉客時只有 1℃，一飲涼透心。雞尾酒共有 8 款，最特別係加咗極具本土特色五加皮、青島啤，仲有 10 年的日本余市威士忌、清酒同前頁介紹過嘅健康 Kombucha 等，枝枝有性格仲有好搞鬼的名字。
Cocktail $83（肆至陸及捌號）、$90（壹至叁及柒號）
上枱時，每枝 cocktail 約為 1℃，每支都配搭一款班戟，飲極都咁涼快，但若想原枝買走返屋企飲，加 $25 亦得。
壹號 Alcoholic's breakfast：加咗冷泡咖啡同呍呢嗱伏特加，超醒神。
貳號 Vintage：Old fashion 嘅變奏，加五加皮，啃！
叁號 The innocent Geisha：用日本清酒加 rosemary，咪好似日本藝伎咁 style。
肆號 The hyper Mongrel：青島啤酒加上 Punt e Mes 苦艾酒，飲完好 hyper。
伍號 Harry had a little lamb：以 Taboocha 加上青瓜、西瓜同薄荷製，酒精少好綿羊唧。
陸號 Shrooming kiss：君度酒加上菠蘿及薄荷。
柒號 The constant black face：五加皮加呍呢嗱伏特加，啃到黑面。
捌號 Queen B：清酒加橙汁及青檸汁，風格似要呵嘅女神。
唔同口味嘅雞尾酒，特別設計嚟配這裏嘅古靈精怪 pancake，好似壹號 cocktail 就加咗咖啡，呼應配咖啡牛油嘅 12H78C、叁號又以清酒回應 Pearl 班戟裏的芥末沙律醬、加咗五加皮的超啃柒號則配濃味的 chocolate cake，堂飲絕對有驚喜。
孖人廚房
Caleb（左）及 Joshua 諗頭超多，今次諗到以樽裝 cocktail 配古靈精怪的 pancake，真係好似幅圖咁，咁富爆炸性。
Pearl $128
蕎麥班戟趙頭更佳，配搭北海道帶子、魚子及辣椒油 caviar，醬汁則是芥末沙律醬。
12H78C $98
班戟配上低溫慢煮 12 小時的 short rub，配加了咖啡豆的牛油 sauce 及無花果。
Chocolate cake $78
70% 的黑朱古力慕絲配煮過的香蕉、上面是用朱古力包裹的炸豬皮，鹹中帶甜。
Citrus & berry $58
加了富亞洲風味的柚子吉士及 ricotta cheese，再加了桑莓玫瑰蓉。
Stack
地址：西營盤第三街 1 號地下
電話：2549 9787
營業時間：6pm-11:30pm，星期一休息
收費：現金及信用卡，設加一
交通：於港鐵中環站乘 5 號城巴前往
泊車：高街設咪錶位
平均消費：$300
(原文摘自《U Magazine》)
↓【限時搶⚡】Kilo Calo慢煮即食雞胸套裝！↓
↓ 雞胸經低溫慢煮烹調！/ 提供研製多時的獨特口味！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
