以為桃花源小廚老闆黎有甜做手工粵菜叻，但原來他炮製巴基斯坦咖喱亦耍家。最近，更在上環開了家 Curry Box by Tim，由大兒子黎宇文（Maurice）打理。
Maurice 說：「爸爸以前做恒生總行博愛堂大廚及員工餐廳主管，認識了不少巴籍護衛同事，就跟他們學煮咖喱。桃花源最初開店時，有賣碟頭飯雲吞麵，咖喱雞飯好受歡迎，不過後來搬了大舖，反而無人柯打，咖喱膽也只用來煮蟹同做炒飯，有啲可惜。」他心裏一直想以「好味咖喱」為號召，獨立開店，對上環更有種情意結，因此也選址這裏。「比起開酒樓，籌備這店輕鬆得多。賣單一種類食物，又主力做外賣，舖頭不用太大。」Maurice 說。
小店分兩層，約有 20 個座位，裝修簡單舒服似 Cafe。餐牌暫時也只有咖喱雞、咖喱牛筋腩及咖喱雜菜 3 種菜式，既可當菜式般單賣，也有分量輕盈點的套餐，可選配白飯、法包或腸粉，兼咖喱。
這店的巴基斯坦咖喱膽由甜師傅調配，一如當年用上蒜蓉、乾葱、洋葱、香茅、芫茜、番茄、牛油及咖喱粉等，唯一不同的是，店子以機器取代人手煮咖喱，省時省力，質素穩定。咖喱沒下椰奶，更能嘗到食材真味，沒辣得噴火，卻為舌尖帶來點點刺激，質感帶濃稠，令人一口接一口的吃不停。待店子遲些上了軌道，Maurice 說會增加咖喱款式，像牛脷，還有他至愛的豬皮魚蛋，來碗嗱喳麵最啱胃口！
咖喱雞套餐 $68
復刻當年桃花源開店的熱賣菜式，以原隻冰鮮雞炮製，肉質爽彈有雞味，炆得很入味。
咖喱牛筋腩套餐 $70
半肥瘦冰鮮牛腩，經醃味、蒸腍再炆煮，鬆化不韌，跟軟滑牛筋是最佳組合。
咖喱雜菜 $66
咖喱膽內沒用肉，順理成章也做個素食版，內有豆角、椰菜、茄子及薯仔等，清新。
Curry Box by Tim
地址：上環禧利街 16 號地下
電話：2362 2120
營業時間：星期一至六 11am-8pm，星期日休息
(原文摘自《U Magazine》、文：Pam、圖：Lamlam)
↓【限時搶⚡】Kilo Calo慢煮即食雞胸套裝！↓
↓ 雞胸經低溫慢煮烹調！/ 提供研製多時的獨特口味！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
