呢排開了不少新款雪糕，除了大玩雪糕味道外，外形亦大玩特玩，一起睇吓現在雪糕界有甚麼新玩法！
即炸「油炸鬼」
這杯高到嚇親人的雪糕，其實係將傳統西班牙美食 Churros x 軟雪糕，韓國人又一偉大發明。紅磡 Eyescream and Churros 的店主 Muse 到當地旅行時一試愛上，他說：「首爾有好多舖頭都有賣，想大家響香港都食到，於是就開店。」
外形似條油炸鬼的 Churros，在店內即叫即做，炸香後，更會沾上肉桂粉、亞麻籽及葵花籽等，入口超香脆，淨食當然好味，但別忘了底下的軟雪糕，由意大利 Gelato 粉混合意大利牛奶炮製，creamy兼奶味香濃，用熱辣辣 churros dip 來吃，冰火交融，過癮。
Eyescream and Churros
地址：紅磡德民街29號德民大廈地下B1舖
電話：從缺
營業時間：星期一至日 12nn-10pm
爆脆蜂蜜分子
蜂巢雪糕賣到成行成市，但食客反應不一，有人嫌太甜又有人話蜂巢吞唔到，在西環 Grandy Mary 搵到的雪糕「蜂蜜分子」，就可算係 light 版蜂巢，而且將蜂巢造到似足魚子咁，粒粒爆脆，大人細路都咁 like。
店主 Dorothy 每月都飛去台灣及韓國，睇睇最新的雪糕行情，店子雖有賣蜂巢雪糕，但她從台灣引入這種粒粒的「蜂蜜分子」，既給客人多個選擇，亦為獨家 gimmick。分子粒粒裏是天然蜂蜜，甜香不膩，外層很薄脆，放進嘴裡咬破，超過癮。襯埋每日新鮮以日本雪糕漿混合北海道 3.6 牛奶製做的幼滑雪糕，蜜香奶香交融，好夾！
Grandy Mary
地址：西環卑路乍街 6G 號新城大樓 1 號地舖
電話：從缺
營業時間：星期一至日 2pm-9:30pm
焦糖爆谷山
爆谷做 toppings，唔少韓式雪糕店都有，但紅磡 Froyo 店 Cool More 勁有 heart，小小店子竟然放部爆谷機，每日即席炮製焦糖味爆谷配雪糕。
店主 Esther 得知首爾有著名 Froyo 店大賣爆谷雪糕，覺得可以一試，開店就以此做主打。爆谷材料全部用美國貨，包括粟米粒、焦糖粉及椰子油，以椰子油代替牛油，特別健康。
粒粒啡色爆谷破機而出，似足戲院小食部，全店彌漫住爆谷香氣，實在好吸引，而 Froyo 亦同樣每日用意大利乳酪粉、法國牛奶及新鮮乳酪鮮製，質感實在得來又夠軟滑，將爆谷堆滿 Froyo 表面，成座山爆谷山咁澎湃，又香，又甜，又脆。
Cool More
地址：黃埔民兆街 18 號 L3C-1 店
電話：9360 7770
營業時間：星期一至四 12nn-9pm、星期五至日 12nn-10pm
