當大家睇緊呢個專欄嘅時候，已經係大年初二啦，我祝各位男仔青春常駐美麗動人、女嘅呢就個個似羊千嬅，減肥成功又有好老公。話晒都係新年嘛，梗係應下節食中餐，所以今個星期我就去咗一間型到震嘅中菜館為大家以脷試法。
實不相瞞，我係拜讀咗多本雜誌而對佢產生濃厚嘅興趣嘅，而惹起我關注嘅，就係舖頭出面用麻雀做外牆，成個四方城都攞埋出嚟見人，新年流流幫襯最啱。隔住本雜誌同實體體驗簡直不可以同日而語，phycially 嚟到呢度，我已經被入門口嗰幢金色招財貓牆吸引住，我諗嗰度有 50 隻招財貓仔，啲貓爪喺度搖下搖下，睇得一陣我就被佢哋嘅金光迷得一陣陣。
招財貓都係前奏咋，戲肉起地牢嗰層。呢度嘅用餐區起地牢，一邊係九龍皇帝嘅墨寶、另一邊就有啲燈箱（我後面嗰幅），睇真啲係畫咗嘉咸街的街景，成勁舖好型仔，原來成間舖嘅設計都係 G.O.D. 負責，難怪本土得又鬼死咁型。麻雀之外，我就呢最鐘意本餐廳，啲用色同字款老土到呢...，但勁 like 囉。
而家係 globialzation 嘅世界，國界都快消失晒，呢度做嘅做中菜咪就係咁囉，無乜邊間。一切都同鬍鬚主廚 Jowett 有關，佢係台灣人，後來移民咗去溫哥華，又喺悉尼日菜名店 Tetsuya's 打過工，本身學法國菜，佢將西菜、法菜、中菜、日菜同亞洲菜技術及概念四龍出海，Ms.G's 及 Mr.Wong，3 年咋就攞到當地《The Sydney Morning Herald's Good Food Guide》評級為一帽及二帽殊榮，而佢就上咗香港美食癮，所以就決定嚟呢度開中菜館。
大家唔使驚，呢度唔係食美利堅嗰種鬼佬西餐，中國人嚟都接受到㗎，好似嗰油甘魚沙律咁，其實幾鬼佬嘅，只不過魚肉跟返中國人做法醃過 30 分鐘，入味咗嘅，絕對唔騎呢；呢度仲有怪味醬手撕雞、蒸魚都有，前者用芝麻、花椒和辣油再加 Jowett 的白滷水滷，好 china 㗎，後者好實驗性，想鬼佬都試下，所以傳統嘅酸菜、醋辣椒外，仲加左昆布汁蒸，100 個放心，唔騎呢仲幾好味㖭。飯後仲會學足唐人街中餐咁，一人人粒幸運曲奇，我超期待喎，不過我係唔會話你知我塊曲奇寫啲乜嘅！
口利福
地址：中環伊利近街 1 號地下
電話：2810 0860
營業時間：星期一至四、星期日 6pm-11pm，星期五及六 6pm-12mn
(原文摘自《U Magazine》ISSUE 482、文：小儀、圖：Kam)
