小儀：橫浜冰火鯛芭菲

呢條魚系出名門㗎，來自好多人別戀嗰度呀──橫浜，好多人都以為鯛芭菲係嚟自韓國，未嚟呢間幫襯之前我都係咁諗，食咗先知原來係日本人傑作，紅到去台灣韓國，咁潮就梗係要試下。

唔好以為條鯛魚係麵粉加蛋奶，口感似雞蛋糕就算，人哋紅遍亞洲梗係有原因，呢條魚最大特色係用咗九州麵粉同美國杏仁粉做，裏面仲有吉士、紅豆或matcha 味餡，咬落去呢，「魚皮」部分好脆，但中間又好似日本啲 mochi 咁煙煙韌韌，我好鍾意食 mochi，口感真係「茅得輸」。最令我喜出望外嘅係：唔好睇佢只不過係一位嬌小女士手掌咁大，但超級墜手㗎，食一個真係會有飽嘅感覺㗎。

比起普通嘅雪糕雪條，芭菲肯定係我哋貪心精嘅 dear，呢度嘅配料唔少㗎，屬於唔怕死、唔怕肥嘅可以揀呍呢嗱、朱古力或者士多啤梨雪糕做底，不過招牌其實係佢哋嘅 homemade yogurt，酸甜味好突出，好似會瘦啲咁喎，配埋生果、不同口味的醬，足足 17 款口味。我最 like 係加咗香蕉同焦糖醬嘅口味，另外 2 款加紅豆綠茶同黑糖黃豆粉嘅都好「和」味。

至於我講嘅「冰火」效果，咪就係鯛魚仔拿上手係暖，但上面嘅雪糕係凍冰冰嘅，大大啖噬落去，外面 36°C 都唔關我事囉。

Tai-Parfait
地址：銅鑼灣時代廣場地庫 B110 號舖
電話：從缺
營業時間：星期日至四 10am - 10pm，星期五、六及公眾假期前夕 10am-11pm

想睇更多？即上 甜品 / 銅鑼灣 特集！

歡迎你 like 我哋 U Food Facebook Page / U Food Instagram ，取得我哋更新更快嘅資訊！