試食！Jamie’s Italian 下午茶

Jamie’s Italian 嘅 Afternoon Tea Set 每日由下午 3 點至 6 點供應，包括前菜、甜品木板佐食以及餐飲，每位 $158。

咁個 set 有咩食呢？首先上枱嘅前菜木板佐食有 4 款意式醃肉，包括︰風乾火腿、開心果意式肉腸、茴香莎樂美腸同辣肉腸、招牌配菜意大利芝士雲吞、羊奶芝士配甜辣椒醬，仲有紅蘿蔔紅菜頭沙律。醃肉要由最淺色嘅風乾火腿食起，再到味道較濃嘅開心果意式肉腸同帶辣味嘅茴香莎樂美腸同辣肉腸。小編比較喜歡味道較淡嘅風乾火腿，開心果意式肉腸會鹹少少同微辣，而辣肉腸就係大辣，唔食得辣嘅朋友要留意。

而招牌配菜—─香脆意大利芝士雲吞，啲雲吞炸得好脆、好香口，咬落個口感有啲似薯角，中間有啲芝士，但唔會太“漏”嘅，屬輕小食。跟住羊奶芝士配甜辣椒醬，羊奶芝士係硬身、薄薄一片，連埋放底嗰塊小薄餅加泰式甜酸醬 feel 嘅 sauce 一齊食，酸酸甜甜，味道不錯。

食完前菜，終於到甜品啦！士多啤梨忌廉、招牌意大利芝士蛋糕以及好受歡迎嘅朱古力 brownie 都有，不過 afternoon tea set 多咗一款平時 menu 無嘅甜品──忌廉蛋白脆餅配雜莓醬。小編特別推介—─朱古力brownie，咁多人點朱古力 brownie 係有原因嘅，嚐甜嘅小編覺得呢個 brownie 唔會太甜，又唔太淡，味道剛剛好，配埋海鹽焦糖雪糕同爆谷，同個 brownie 好 match 呀，brownie 迷可以一試。

其實個 set 都幾飽肚，小編 5 點幾食完之後都已經食唔落dinner。

味道評分：
Afternoon Tea Set 7/10

歡迎你 like 我哋 U Food Facebook Page / U Food Instagram ，取得我哋更新更快嘅資訊！