今年再下一成，5 款食法有新口味登場，仲加插拆蟹服務，配套食物齊齊升呢，酒店謂任食未開始供應，已經有二千幾人預訂！
今年大廚照樣選用四至五兩的太湖蟹公蟹，膏量不錯，質素穩定吃得過；5 款口味除了去年的菊花蒸、薰衣草蒸、風沙大閘蟹之外，更新創冰鎮黃酒大閘蟹和釀焗大閘蟹蓋兩款新食法。最正是冰鎮黃酒蟹，蟹蒸熟後加酒糟、薑及黃酒浸三小時，浸時仲先將蟹奄稍稍揭開，酒香味滲入蟹中，浸的時間剛好，肉不會霉；吃完頭盤吃凍蟹，邊食邊等蒸蟹，流程安排貼心！
建議先食凍蟹，再吃菊花蒸和薰衣草蒸，聞落清香，最吃到原味。拆蟹拆到攰，就係時候食釀焗蟹蓋，鮮拆的蟹粉、蟹肉，加洋葱和蘑菇炒香，釀入蟹蓋中，即點即炸，香口啖啖肉；最濃味的風沙大閘蟹則可留待最後吃。基本上，每位每次可選兩隻蟹，可食足四個半鐘，大把時間慢慢歎。
更貼心的，是今年新增拆蟹師服務！拆蟹師可代勞清走蟹內臟，將蟹身一分為二，一分鐘搞掂，可加快食蟹節奏！不過蟹鉗、蟹腳不會起肉，想食蟹肉的，始終要靠自己。套餐另供應蟹粉頭盤，蟹粉流沙蝦膠丸及花枝丸，外層香脆，彈牙鮮味，讚。菊花薑茶任添任飲，加 $1 仲有足一兩燕窩的蟹粉海皇羹，超抵！任食定價雖然比去年貴幾十元，但因為太吸引，訂位情況超緊張，酒店決定按訂座情況加開一樓及宴會廳座位；想食，都係快手訂啦。
特別推介：
鴛鴦蟹粉流沙丸
純花枝丸和蝦膠丸，釀了蟹粉餡再炸，就連外層的脆米也是將飯風乾 10 個鐘炮製，花心思。
冰鎮黃酒大閘蟹
凍食款式，酒味不會過濃或澀，加入酒糟及薑同浸，更清香。
釀焗大閘蟹蓋
蟹粉、蟹肉混入蘑菇及洋葱，炸得金黃香脆不油膩，鮮甜啖啖肉！
薰衣草蒸大閘蟹
上枱傳來陣陣薰衣草香，聞落清幽，吃下去蟹肉其實不覺花香，似清蒸。
風沙大閘蟹
加炸蒜及泡椒去炸，微辣香口，蟹膏炸過後頗鬆化，和清蒸感覺不同，很惹味。
紫粵軒
地址：將軍澳唐德街 3 號香港九龍東皇冠假日酒店 2 樓
電話：3983 0688
供應時間：即日至 11 月 15 日 6pm-10:30pm（最後落單時間為 9:45pm）
收費：星期一至四 成人$398，星期五至日及公眾假期 成人 $428/ 位、小童 $208/ 位；收現金及信用卡，設茶錢和加一
交通：港鐵將軍澳站 C 出口
泊車：消費滿$500，免費泊車 3 小時
註：任食兩位起，同枱客人均需享用。
相關報導：
今年必知！大閘蟹 4 大行情
放肆任食 大閘蟹！
想睇更多？即上 大閘蟹 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
