行到近天樂里嗰間 The Coffee Academics 咪貢入去囉，但行入啲，天花掛咗啲茶葉竹篩，又有茶壺和書法字畫，咦！茶室咁款嘅！點解咁嘅？點解咁嘅？
明明農曆七月都過咗啦，洋人「哈佬喂」月都出事？哦！原來無鬼怪，係 The Coffee Academics 嘅新概念唧，就係咖啡以外供應埋精品茶飲品，變相令出現「店中店」，外層係香噴噴嘅咖啡室，裏面就收埋個茶 corner。
呢間 hidden 茶室，絕對唔流灘，做得好認真㗎，舖頭搵咗位愛爾蘭茶顧問嚟幫舖頭揀茶葉、拼茶葉，呢度有好多靚茶葉，部分 Single Origin 茶葉係由各地茶園直送，好似印度 Ambootia 有機大吉嶺茶葉、日本靜岡綠茶等，仲有自家拼配嘅 House Blend，蒲 cafe 都飲到靚茶真係喜出望外。
舖頭一向玩開精品咖啡，茶飲一樣咁精品，好似我最冧嘅 Earl grey 咁，呢度破格配熱朱古力，用嚟沖比利時朱古力嘅牛奶用伯爵茶葉浸過，面上放埋柚子蜜再加上一層用伯爵茶牛奶打出嘅奶泡，又係朱古力，又係 Earl Grey，茶味好芬芳，茶的回甘同朱古力仲好夾。近期大熱嘅焙茶浸完牛奶後用嚟打 smoothie，加啲高檔嘅 Manuka 蜜糖同焙茶葉碎，好有 milk shake feel 喎，仲少咗焙茶嗰朕苦味，只留清香，好有新鮮感喎。
如果你 like 簡單飲法，就要試下點我手上嗰杯綠茶，杯茶用咗部 10 萬元的泡茶儀器 Alpha Dominche Steampunk 沖，部機係蒸汽鍋爐虹吸機，用電腦控制，加壓後可以沖盡茶味，好適合用嚟沖單品茶葉，試咗之後，我覺得用呢部機沖嘅茶，回甘味更好，而且 body 厚咗滑咗，幾好嗒！以後唔飲咖啡朋友，去蒲 cafe 唔使再硬掘叫茶包茶咁奄悶啦。
The Coffee Academics
地址：灣仔莊士敦道 35 - 45 號
電話：2154 1180
營業時間：星期一至四 8am-10pm，星期五 8am-11pm，星期六 9am-11pm，星期日 9am-9pm
想睇更多？即上 Cafe / 灣仔 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
