今次真係要 "o趙" 完唱，因為實在太開心，太開胃了，畀我發現淺水灣有間型格沙灘餐廳每個星期有 2 日做 all you can eat，不枉我千里迢迢入淺水灣。
其實我知淺水灣個商場新裝咗一段時間，有好多食肆進駐，終於搵咗個寧靜嘅星期三，入嚟偷閒食飯。未出發，其實已經鎖定呢間沙灘旁嘅型店，你睇間舖型仔到呢，成架古董 food truck 放入舖做 cocktail bar，門口仲有個成一個人咁高嘅街頭藝術家 KAWS 嘅 Original Fake 同 Simpson 迎賓，舖頭另一邊有一幢成 2 層樓高嘅滑水板牆同 Marvel 漫畫真迹，加埋我後面啲真‧型仔坐鎮，嚟睇人睇景都正。
不過，主角仍然係嗰原隻紅彤彤嘅龍蝦，原來佢哋逢星期三、四都有 All you can eat night，星期三嚟係 lobster night，海鮮我最啱，咁我梗係綺夢上身即席食龍蝦啦。碟龍蝦真係好有分量，一隻成 1 磅重，用嘅係美國龍蝦，用 oregano 香草同檸檬辣椒汁調味，龍蝦肉厚又新鮮，呢個價錢包 1 隻龍蝦，但沙律、薯條同白酒都係無限量任吃的。
星期四就係預留畀 meat lover，雖然我都唔嗜牛，但推介大胃王一定要嚟食呀，因為超筍，當晚 15 安士嘅 USDA 肉眼扒無限量任你擦，我睇過餐牌，單點一塊 11 安士嘅美國肉眼已經要 $320，食 1.5 塊係大回本，一樣沙律、薯條任食，不過呢晚就配紅酒。
任吃嘅沙律薯條都好有誠意，個 green salad 超正，除咗菜仲加咗小蘿蔔、羊奶芝士、自己醃的番茜，最抵讚係個 refreshing 得嚟唔油淋淋嘅 pumpkin seed 汁，無論食完龍蝦定牛扒，吃幾啖沙律又可以撻着返個胃；手切嘅薯條更係食到我停唔到口，即叫即炸，又脆又好似火柴咁幼又有澱粉香，喪食到生痱滋都值得。
我要提提大家，記住記住，千祈千祈唔好揸車嚟 all you can eat night，因為紅白酒係任飲嘅，齋食眼光光睇住飲腳飲足全晚，係咪對唔住自己先？一齊飲先開心嘛，應承我唔好做柴可夫.....一晚咁多啦。
Hotshot
地址：淺水灣海灘道 28 號地下 114-115 舖
電話：2515 1661
營業時間：星期一至五 12nn-till late，星期六日及假期 10:45am-till late
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
