入到去無華麗裝修，但我勁鍾意 coffee bar 對面一排靠牆座椅，老闆專登用咗啲軍用鐡皮箱做小茶几，唔係豪裝，但感受到老闆真係好有心布置。
呢兩位咖啡師係咪好靚仔先？左邊叫阿 Sum，另一位係 Benny，好多報道都標榜佢哋兩個係「暖男」，大家係咪以為我一定為睇靚仔而來，嘿嘿！我 100% 為咖啡而嚟，睇到靚仔係 bonus‧‧‧‧‧‧bonus 嚟唧‧‧‧
同兩個咖啡師傾開，原來兩個係怕醜仔，佢哋好抗拒「暖男」呀、「靚仔」呀呢啲稱號，佢哋一心淨係想沖靚咖啡。事關兩個大男孩好努力鑽研咖啡，Sum 更係 2011 年「香港咖啡師大賽」的冠軍，唔係淨係得個殼嘅「花瓶男」，佢哋真係好實力㗎！
連呢度供應嘅咖啡都好有兩人踏踏實實嘅 style，咖啡唔多花樣，主攻澳式 style 咖啡同手沖，意式咖啡用嘅拼配豆，係兩個男孩自家烘培，以哥倫比亞 + 非洲耶加雪夫豆，果香味、甜度都不俗，好易入口，加奶嘅 Flat white 最是招牌，加咗奶又滑又甜，連我呢啲入門級嘅都唔會覺得太濃。
手沖咖啡都幾得意，佢唔講，我仲以為係茶，但飲落又有花香、又有啲似果茶咁酸酸地，但含喺嘴仔度又有蜜糖甜品，佢哋開估，原來用咗淺炒少少嘅耶加雪夫咖啡豆，手沖畀咗個新體驗我。
我係唔會空肚飲咖啡嘅，佢哋啲柚子沙律、無花果撻都係自家製，啲沙律菜仲係喺附近街巿賣，唔花巧，平平實實。我好認真講：真係「嗒」得佢哋杯落㗎，我指咪一味掛住望靚仔，而係認真嗒佢哋杯咖啡呀，babe！
NOC Coffee & Roaster
地址：中環嘉咸街 34 號地舖
電話：2606 6188
營業時間：星期一至五 9am - 6pm，星期六至日 10am - 6pm
歡迎你 like 我哋 U Food Facebook Page / U Food Instagram ，取得我哋更新更快嘅資訊！
