400 呎豆膶小舖，有幅大大的落地玻璃窗，日間陽光透進，光猛開揚，店裏店外以鳥籠和小盆栽裝飾，玻璃窗又有法式手繪花紋圖案，滿室法式悠閒與優雅。
店名經已透露，主打 Pain Perdu（音：班 bed 豬），即法式西多士。別誤會！不是港式法蘭西多士！話說法國家庭會以法包浸牛奶蛋漿煎香，加肉桂和糖製成甜品；這裏做的，就是這種 style，再配上不同生果、忌廉和雪糕等，變奏出多種口味。多士食落外脆內軟，又冷又熱；又有鹹味多士選擇，作為 light lunch 或下午茶都啱。
正宗？當然！皆因幕後主腦是西貢著名法國餐廳 Chez Les Copains 的主持人 Bonnie。這位法國藍帶女廚對用料最執着，法包請本地工場每天鮮製，綿密鬆軟；水果、鮮忌廉、牛奶、蜜糖分別來自日本、法國和澳洲，保證高質。做法更講究，多士以焗代煎，少了油膩，多了香脆；焦糖自家煮，特別香；忌廉即打，特別滑。
店中亮點還有自製雪糕，有牛奶和乳酪鮮果軟雪糕，前者奶香濃郁，後者用鮮果肉高達 90% 的法國急凍果蓉炮製，果味天然濃重，紅莓、芒果、熱情果，款式天天轉。小店更不時有特別推介，最近有奄列蛋糕、戚風蛋糕、法國馬檸，賣相靚到暈，相信又會在 fb 和 ig 瘋狂曝光。
肉桂焦糖多士 $40 (單點)、$55 (套餐)
多士入口咔嚓一聲，外脆內軟，充滿肉桂焦糖甜香；配自製香濃牛奶雪糕和幼滑即打忌廉，邪惡！多士另有原味、蘋果、芒果、士多啤梨、蜜瓜、莓子等口味。
白菌多士 $48 (單點)、$63 (套餐)
蘑菇即點即炒，味道特別甘香鮮活；加 Mild Cheddar 和 Monterey Jack 芝士焗至半融，香噴噴！
軟雪糕奄列蛋糕 $38
蛋糕夾着的是自製牛奶和紅莓乳酪雪糕，軟綿綿夾香滑，配雜莓吃，酸咪咪，果香滿滿。
蜜糖戚風蛋糕 $78
蛋糕入口很輕軟，滲透濃濃蜜糖香；抹上忌廉、鋪上鮮果，賣相繽紛可人，直徑 4 吋長，兩三個朋友分享最啱。
每日精選雪糕 $28
自製乳酪雪糕口味天天不同，可選果味、牛奶或扭紋；今天是紅莓味，酸咪咪莓味天然，質感幼滑；中間仲有脆脆。
Pain Perdu Salon de The
地址：旺角豉油街 126 號地下 K 舖
電話：3709 8267 / 9309 9612
營業時間：星期日至四 11:30am-12mn，星期五及六 11:30am-1am
註：套餐可配法國茶、梳打、咖啡或多一杯雪糕。
(原文摘自 U Magazine ISSUE 546)
想睇更多？即上 甜品 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
