呢杯屎雪糕（堅持咁叫），由大坑雪糕店 Loooop 所創，推出兩星期，已成為店中 best seller！每個來買既人都會問：「嚿屎食得嗎？」食得！其實係朱古力味蛋白脆餅！味道唔似一般 meringue 咁甜，脆得嚟好鬆化；連上面用紙造既眼睛同咀仔都可以食埋落肚！
食得嘅屎同食得嘅紙都係 Loooop 既賣點，由老闆 Ethan 同 Polly 構思出嚟。驟眼睇店中雪糕款式好少（最近才由 4 款增至 8 款），但每款都經悉心經營，造型全都誇張到爆！屎係最新傑作，仲有煙仔、菇菇、金像獎造型，又有 cone 中 cone；每杯都灑滿紙公仔，又或滿布金色珠珠爆谷棉花糖‧‧‧‧‧‧特別節日仲有 specials：新年期間，雪糕上加大桔和心心造型棉花糖，萬聖節又有螢光雪糕，好爆！
爆到一個點，係全杯都食得落肚，包括杯、圍住杯既紙圈兼紙公仔裝飾。唔使驚，紙圈同裝飾用米紙同食用顏料印製，由美國直送，無乜味道，入口即融，有啲似白兔糖包裝紙，彩虹嘴唇青豆菇菇煎蛋哈哈笑 V 字手勢‧‧‧‧‧‧花款超多，煙仔就係用米紙捲住朱古力做成，係 Selfie 恩物。
雪糕杯亦不甘平凡，唔係大路威化，用曲奇餅做，有朱古力、黑椒、檸檬、玫瑰共 7 種口味，牛油味重兼鬆化；軟雪糕有兩款，藍色先係招牌，原來係乳酪味，用意大利雪糕粉、法國忌廉加澳洲牛奶、以歐洲名牌雪糕機製造，雪糕味道個性不凸顯，但質感細滑，好少食到冰。
最近老闆更挑戰難度，喺軟雪糕上插一枝甜筒，成個 UFO 咁！製作更花時間考工夫，雪糕融得快，要動用兩人分工，話我話，分量咁勁，食既人都要分工合作！
OOOPS！ $55 (威化筒 $50)
Meringue、Pink Chocolate Sauce、紙藝裝飾、Blue Moon Ice-cream、Rose Cookie Cup
TGIF $50（威化筒 $45）
煙仔以米紙捲着朱古力製成，成枝食得！配藍色雪糕和紅唇紙裝飾，好誘人！牛油味曲奇杯，很甘香。
MUAH $55（威化筒 $50）
熱賣款式之一，菇菇亦是蛋白脆餅，「菇椗」是棉花糖，造型 kawaii，配清新檸檬味曲奇杯，好受女生歡迎。
WOW $58（威化筒 $53）
為慶祝開業一周年設計，造型似足金像獎！朱古力榛子雪糕上有金色朱古力珠珠和朱古力塊，加添脆脆口感。配黑椒味曲奇筒，好特別！
UFO $58（威化筒 $53）
Ice cream、Waffle cone、Gold hazelnut、Hazelnut sauce、Coco powder
Loooop
地址：大坑浣紗街 2 號 A 舖
電話：8192 9320
營業時間：星期二至五 2pm-12mn，星期六及日 12nn-1am，星期一休息
文：Yoyo、攝影：Jay
想睇更多？即上 甜品 特集！
歡迎你 like 我哋 U Food Facebook Page / U Food Instagram ，取得我哋更新更快嘅資訊！
