本土新口味抬頭！

最Hit食訊

發佈: 2016.06.12

文:

味道好熟悉，卻又估唔到可以變做雪糕！味道好傳統，仲鈎起埋集體回憶；如果你係真‧香港人，一定會 like。

真‧菠蘿包雪糕！
你無聽錯！係菠蘿包味雪糕！聽講甜品師竟然自家焗菠蘿包，以牛奶浸軟，用嚟做雪糕！點解咁大費周章？一為傳神，二來自製保證不含豬油同添加劑，感覺健康啲。雪糕唔似菠蘿包咁甜，最驚喜係嗒到粒粒菠蘿皮碎，好過癮！為咗貫徹「真‧菠蘿」身份，雪糕更特別加入焗過的菠蘿料，果香滿滿又有咬口，唔覺突兀，難怪在循眾要求下重新推出。

菠蘿包雪糕 $38/ 單球
雪糕滑溜溜，食到菠蘿脆皮的碎，有沙沙質感，好香；細心品嘗，仲吃粒粒烤菠蘿，加添果香。

童年回憶返晒嚟！麥精雪糕
點解 XTC Gelato 咁喜歡推出本地口味甜品？因為好多人如我，都以為佢係外國品牌，其實知佢係香港原創。香港雪糕店，梗係做返香港味雪糕；好似季節限定既麥精雪糕，用真‧維他奶麥精和澳洲牛奶炮製，食落比飲既麥精淡丁點，但麥精味卻好傳神真實，過癮！

麥精雪糕 $38/ 單球
用真‧維他奶麥精製作，味道較一般輕淡，卻超真實，過癮！

XTC Gelato
地址：尖沙咀天星碼頭 KP-01 舖
電話：2368 3602
營業時間：11am-11:30pm
註：全綫 XTC Gelato 有售。真‧菠蘿包和麥精雪糕屬 3 至 6 月分季節口味，款式每天轉換輪流上場。

起沙！流沙奶皇包雪糕
Lab Made 的雪糕，構思大多從香港人喜歡食嘅嘢着手。流沙奶皇包係一例。微黃色雪糕上滲出一點點橙色，原來係鹹蛋黃！雪糕除了基本的蛋、奶、cream，更加入吉士和鹹蛋黃做，鹹蛋黃煮至流質，卻仍帶沙沙質感，甜中又嗒到少少甘鹹味，十足流沙包既餡，盞鬼！

流沙奶皇包雪糕 $90/475 毫升
仿照奶皇包的味道炮製，食到吉士甜香，又帶少少鹹蛋黃的甘鹹，軟滑中帶沙沙質感，吃得出真材實料。

Lab Made
地址：大坑布朗街 6 號地下
電話：9355 4476
營業時間：星期一至五 2pm-12mn，星期六 1pm-12mn，星期日 1pm-11pm
註：
1. 筒裝 Gelato 於兩間門市、觀塘 Ocean Origin 生蠔刺身專門店、大角咀有機田園有售
2. 預計暑假會推出細杯裝。

混醬！疑似豬腸粉雪糕
最近沙田 18 推出豬腸粉雪糕‧‧‧‧‧‧唔係！係「椰子花生甜醬雪糕」先啱！餅房主廚賴耀輝師傅話靈感確係嚟自豬腸粉；白色底雪葩唔係腸粉味，係椰子味，用椰漿、椰奶加椰子酒製成，椰味濃厚；亮點係上面嘅麻醬、甜醬同芝麻，感覺匪夷所思，味道卻出乎意料地夾！鹹鹹甜甜融合得自然，嗒下嗒下，真係會掛住街邊嘅豬腸粉喎！

椰子花生甜醬雪糕 $42
雪葩椰子味濃厚，質感柔滑；麻醬自家調校，花生醬下得重手，超香；與甜醬和芝麻融合，閉上眼，不就是豬腸粉嗎？

沙田 18
地址：沙田澤祥街 18 號香港沙田凱悅酒店 4 樓
電話：3723 7931
營業時間：星期一至五 11:30am-3pm、5:30pm-10:30pm，星期六、日及公眾假期 10:30am-3pm、3pm-4:30pm（供應下午茶甜品拼盤）、5:30pm-10:30pm

宵夜必備！腐竹糖水雪糕
講 Local 口味雪糕，分子雪糕店 Lab-made 係專家。代表作好多，最搞鬼係腐竹雞蛋糖水雪糕，一年半前推出液態氮版本，最近仲出埋 Gelato，即係可以 take home！標榜不同雪糕嘅基底都唔一樣，腐竹蛋的雪糕漿揼本用百福豆漿做，加腐竹、本地牛奶、法國忌廉煮完打碎再隔渣，豆味濃香，做成 gelato，質感比液態氮雪糕來得實淨濃厚，驚喜位係食到腐皮！買返屋企看門口，深宵隨時都有「糖水」食。

腐竹蛋糖水雪糕 $90/475 毫升
比一般豆漿更有豆味，最讚係食到片片腐竹，口感加晒分！Gelato 質感幼滑細密。

Lab Made
地址：大坑布朗街 6 號地下
電話：9355 4476
營業時間：星期一至五 2pm-12mn，星期六 1pm-12mn，星期日 1pm-11pm
註：
1. 筒裝 Gelato 於兩間門市、觀塘 Ocean Origin 生蠔刺身專門店、大角咀有機田園有售
2. 預計暑假會推出細杯裝。

一吃醒神！仲夏子薑雪葩
夏天悶熱，以前嘅人鍾意食幾片子薑醒神一下。「沙田 18」的賴師傅最近竟想到用子薑做雪葩，cool！將現成浸好的子薑磨汁，特別加入老薑汁，做出淡橙色雪葩，入口先食到子薑微酸清甜，好 refreshing！嗒嗒下陣陣薑既辛辣滲出，味道真實天然而且夠「薑」。唔單止老人家喜歡，後生女亦一吃愛上。

自製子薑雪葩 $42/球
淡橙色雪葩討人喜愛，入口軟綿冰涼，先是屬於子薑的酸咪，味道清甜天然；嗒一會，老薑辛辣徐徐滲出，滿足好薑之徒。

沙田 18
地址：沙田澤祥街 18 號香港沙田凱悅酒店 4 樓
電話：3723 7931
營業時間：星期一至五 11:30am-3pm、5:30pm-10:30pm，星期六、日及公眾假期 10:30am-3pm、3pm-4:30pm（供應下午茶甜品拼盤）、5:30pm-10:30pm

茶餐廳 feel 港式奶茶雪糕
連鎖品牌嘅奶茶雪糕，一般都較淡，似英式奶茶；XTC Gelato 出口就唔同，入口滑溜，茶味夠晒濃，係茶餐廳嘅味道！當然啦，師傅學足茶餐廳水吧嘅茶師，以紅茶葉、高身茶壼同茶袋，泡一壼靚紅茶用嚟做雪糕；茶用 Lipton，加上茶與奶的比例適中，茶味香濃唔澀，兼好有 local feel，加喺蛋撻上吃，正！

奶茶雪糕 $38/ 單球
堅持用真材實料炮製，以 Lipton 茶葉泡紅茶再加牛奶製成，茶味突出，質感夠厚身，是地道港式風味。

XTC Gelato
地址：尖沙咀天星碼頭 KP-01 舖
電話：2368 3602
營業時間：11am-11:45pm
註：全綫 XTC Gelato 有售。真‧菠蘿包和麥精雪糕屬 4 至 6 月分季節口味，款式每天轉換輪流上場。