無見一輪，位於尖沙咀美麗華商場的新茶室，確是大咗又靚咗！新茶室的座位比首家茶室為多，可以容納到 69 人。茶室沿用槐木裝修，並放置由日本運送到港的暖簾及榻榻米，Keep 返中村藤吉於京都宇治本店的傳統風貌。
食物方面選擇都多咗，藤吉拼盤絕對是為患有選擇困難症的朋友而設，拼盤包括多款由抹茶和焙茶製作的招牌甜點，可以食到抹茶及焙茶雪芳蛋糕、香濃抹茶芝士蛋糕、抹茶焙茶扭紋軟雪糕、招牌抹茶啫喱，仲會配上時令水果及鮮忌廉，一次過滿足 N 個願望！
香港店更加會跟京都本店同步推出期間限定的士多啤梨芭菲，芭菲杯以鬆軟的抹茶雪芳蛋糕作底，配抹茶雪糕和香滑軟雪糕，並灑上脆脆的玄米及口感煙韌的白玉丸子。中間加入了自家製的香滑士多啤梨忌廉、綴上獨有的櫻花蓉及士多啤梨蓉、配以抹茶啫喱及新鮮士多啤梨，最後灑上一層綠茶紛，又紅又綠、又有櫻花蓉又有士多啤梨，豐富到不得了。
要食返傳統味道，當然無問題啦！日本傳統甜品葛切，由葛粉製成，賣相好似呈透明狀的麵條，口感煙韌爽滑，進食時蘸上自家製沖繩抹茶黑糖漿或黑糖漿，葛切冰涼爽口。而大受歡迎的蕨餅，會以現場即製形式供應。蕨餅除了抹茶口味，更新增傳統黃豆粉口味，搭配醇香黑糖漿及抹茶糖漿，實在太好食了！
試營運日期及時間：2016年6月13至17日，12nn-8pm
正式開業日期及時間：2016年6月18日，12nn-10pm
中村藤吉
地址：尖沙咀彌敦道132號美麗華商場3樓3005-9號舖
電話：2156 1168
備註：茶芥每位港幣10元，每位食客必須惠顧最少一份飲品或食品，用餐時間為每位90分鐘。
文：Jessie
歡迎你 like 我哋 U Food Facebook Page / U Food Instagram ，取得我哋更新更快嘅資訊！
