諗出唔係用碟上嘅生果盅窩夫，造型相當浮誇，加埋大量的鮮果，真係 refreshing 到爆，食窩夫都可對抗炎夏。
女士真係特別有美感，平平無奇嘅窩夫，落入阿 Jo 手上做一做專業 styling，最佳衣著獎都有得拎。邊個話窩夫一定用碟上？阿 Jo 就大膽咁掉咗啲餐碟，改以原個蜜瓜同菠蘿來做盛器，蜜瓜盅窩夫由廚房運出嚟嘅一刻，全場眼光不禁跟住呢個窩夫生果盅移動，餐廳好落本，用原個韓國哈蜜瓜挖出瓜肉波波，再配埋火龍果、芒果、雪糕同 2 件即製窩夫，韓國哈蜜瓜無渣，蜜甜味又重；造型再浮誇都仲有，以菠蘿做兜，半個菠蘿起肉，配合奇異果、士多啤梨、雪糕同窩夫，菠蘿香係咁飄埋嚟，一條女捧住食，霸氣外露了。
同場仲有 2 款 low key 啲啲嘅激多生果窩夫，超健康，無坊間嘅窩夫咁肥嘟嘟，女人真係特別知女人心意。當然，呢度一樣有支援吸脂死死團嘅肥嘟嘟版窩夫，鐵板 + 抹茶窩夫 + 抹茶醬 + 抹茶軟雪糕呢個配搭，肥妹就梗㗎嘞，但全個都用京都百年老字號抹茶粉做，一啲都唔甜，仲幾有抹茶甘香，babe！減肥呢味嘢，食埋呢餐再諗啦。
韓風哈蜜瓜鮮果窩夫 $168
原個的韓國哈蜜瓜，瓜肉被挖成波波，加埋火龍果、芒果等做密瓜盅，上面放了 2 件即烘的窩夫、朱古力棒及雪糕。
菠蘿雜果窩夫 $168
唔知意念係咪來自泰式炒飯，這款將老套的菠蘿炒飯換成生果，菠蘿挖出果肉後切成片，加上士多啤梨、奇異果、雪糕及窩夫，新鮮菠蘿香味衝埋個鼻，比坊間的加 cream 吃更加健康。
鐵板宇治抹茶窩夫 $78
這款窩夫裏的抹茶元素全用逾 100 年歷史的京都抹茶粉製，窩夫鬆化帶甘香抹茶味，軟雪糕也好味，滑溜之餘，奶香茶香平均，窩夫下仲墊了塊多士，淋上自家的甜甜抹茶醬，熱辣辣噴晒煙，好吸引。
士多啤梨梳乎窩夫 $98
窩夫上士多啤梨勁多，相當重本，加上士多啤梨味雪糕，係蛋之使徒的經典至愛。
小甜谷
地址：銅鑼灣謝斐道 482 號信諾環球保險中心地下 4-6 號舖
電話：2325 0208
營業時間：星期日至四 11:30am - 1am、星期五至六 11:30am - 2am
收費：現金及信用卡，設加一
交通：港鐵銅鑼灣站 C 出口，步行 3 分鐘
泊車：信和廣場 $33 hr
平均消費：$80
備註：尖沙咀金巴利道 86-96 號地下 A-B 舖及大坑書館街 10 號 B 地下亦設分店
相關報導：
愛麗斯夢遊……
本土派 雪糕雞蛋仔
來自星星的雞蛋仔
重口味 綠茶芝士拉絲
外貌協會加持 紫星雞蛋仔
胡椒大尉 太陽蛋的後裔
全球首創 獅子山味雞蛋仔送啤酒
鍵盤戰士 決戰暗黑窩夫
X-Waffle 咖喱吞食戰
當頭起！空氣感梳乎厘班戟
歡迎你 like 我哋 U Food Facebook Page / U Food Instagram ，取得我哋更新更快嘅資訊！
