AEON 樓上 3 大注目餐廳！

認住呢粒豆 親子版 Pokka Café
新開業嘅親子餐廳 Cow Bean by Pokka Café，貫徹和洋風，除了沙律意粉 all day breakfast，還有飯糰烏冬和拉麵，兒童餐仲送埋玩具，小朋友一定 like。新店走健康路綫，並以豆子作主題，好多菜式會以十多款豆子如黑豆、鷹咀豆、紅腰豆作配菜。咖啡迷必試藍山咖啡中最高級嘅「藍山一號」，有駐場咖啡師親自炒咖啡豆，新鮮濃香，鍾意嘅仲可買番屋企㖭！

火山岩燒慢煮美國安格斯西冷配青胡椒忌廉汁 $268
以 60 度慢煮 4-5 小時，鎖住肉汁，口感更 juicy，並以火山岩鐵板上枱，令牛扒表層帶點焦脆。另附招牌焗豆蓉、即摘芥末苗以及芥末汁。


蒜香芝士農夫包 $78
以 Mozzarella、Cheddar 及 Parmesan 3 款芝士炮製，外脆內軟，可以 2-3 人 share。一家人食就最開心，食麵包時可一齊「拉絲」。


變型金剛 - 天火 $88
內有豚肉烤腸、炸店揚雞、肉醬意粉、飯糰、野菜、自家製牛乳布甸及橙汁，隨餐附送玩具，款式不時轉換。


魔法寶箱 $88
包熱狗、炸雞鎚、炸薯條、粟米、自家製牛乳布甸及橙汁，大堆頭！


（左）黑白牛牛奶昔（右）士多啤梨牛牛奶昔 各 $48/ 杯


朱古力 （冷 / 熱） $42


餐廳由丹麥引入非基因改造、極易種嘅微綠蔬菜。只要今日放上營養補充劑，喺室溫種植，7 日後就有新鮮蔬菜，暫有蘿蔔苗、芥末苗及火箭菜。


裝潢採木系和洋 style，空間感十足，最啱一家大細嚟開餐。

Cow Bean by Pokka Café
地址：鰂魚涌康山道 2 號康怡廣場（南）AEON 康怡店 3 樓 L301 號舖
電話：2568 6537
營業時間：星期一至五 11am-10:30pm，星期六、日及公眾假期 10am-10:30pm

踩過界 別天神做埋茶房！
「別天神」一向以拉麵出名，估唔到佢今次開茶房！走日式西餐廳路綫，新店正熱推蟹祭，以松葉蟹、鱈場蟹做主角，推出松葉蟹肉沙律配蟹肉汁、松葉蟹腳咖喱飯、鱈場蟹腳拉麵等。當中以蟹肉沙律最為吸引，一上枱已被「蟹山」嚇倒，分量十足，食落啖啖肉之餘，蟹肉汁好鮮味！另加 $20 仲可獲日本蛋糕一件㖭！此外，餐廳有花茶及蛋糕供應；雖然花茶種類較大路，但亮點在於客人可自選有田燒茶杯，茶杯款式有廿幾款，心大心細！仲有仲有，收到風，博多拉麵別天神亦即將於 9 月喺黃埔設分店，拉麵迷要留意。


松葉蟹肉沙律配蟹肉汁 $95


松葉蟹腳咖喱飯 $95


鱈場蟹腳拉麵 $95


採訪當日，現場有廿幾款有田燒茶杯選擇，款式都很精美別緻。

茶房別天神
地址：鰂魚涌康山道 1-2 號康怡廣場南座 AEON 2樓
電話：從缺
營業時間：星期一至五 11am-10:30pm，星期六、日及公眾假期 10am-10:30pm

RickySan 新店 超可愛熊貓便當
一聽到餐廳老闆原來係板長、板前嘅 Ricky San，就知道鮨樂 best item 會係吞拿魚。大廚 George 話，除三文魚來自挪威外，大部分魚鮮均來自日本不同縣市，吞拿魚來自日本鹿兒島，並以冰鮮法直送到港，保證夠 fresh。至於壽司米則用上日本新潟越光米，黏性強、口感煙韌有咬口。

餐廳更設兒童專區，推出熊貓便當，以造型盞鬼趣緻嘅便當盒盛載，便當內有可愛嘅熊貓飯糰、蟹子沙律、燒玉子、炸雞。採訪當日，小編見有三四枱 order，大人氣！

熊貓便當 $68


特選什錦盛合 $300
有吞拿魚腩、吞拿魚、金目鯛、八爪魚、池魚、帶子、島根池魚、牡丹蝦、海膽及三文魚子。選料算新鮮，吞拿魚腩夠肥美、油脂味重。


自家製沙律天婦羅 $158
越南虎蝦和冬菇天婦羅粉漿薄而香脆，澆上以明太子、wasabi、柚子製成嘅醬汁，香甜鹹中帶芥辣辛香，不膩。


巴馬臣芝士焗帶子 $148
西日 fuison 菜；用北海道帶子刺身，鋪上脆口嘅巴馬臣芝士粒，配以紫菜、大蒜、海鮮忌廉汁等製成的醬汁，清新中不失香口。


餐廳設壽司枱，可以睇到師傅嘅刀工，亦可與師傅傾下偈。

鮨楽
地址：鰂魚涌康山道 2 號康怡廣場（南）3 樓 L302 號舖
電話：2771 1162
營業時間：11:30am-10:30pm

文：Joyce、攝：Lok、Ken

相關報導：
康怡 AEON Food Court 5 大必食
周末必逛！ 首間海外 AEON STYLE

歡迎你 like 我哋 U Food Facebook Page / U Food Instagram ，取得我哋更新更快嘅資訊！