坐底八卦下，街市 cafe 原來喺一家人開嘅。話說媽媽 Winnie 與囝囝 Dennis 都喜愛咖啡，一直都夢想開咖啡店。兩年前一家三口（仲有 Dennis 細佬） 仲一齊去讀 City & Guilds 咖啡師課程，做好準備。今個月終於圓夢，不過 Cafe 的地點就好搞鬼，喺深井街市！
開喺街市，原來有段故。Dennis 在澳洲 working holiday 時，曾在當地 Cafe 打工，好喜歡那種社區小店文化。回到香港，覺得深井街市靜靜哋，決定投標。入到街市，唔使周圍搵，因為佢哋好 eye catching！玻璃趟門、吧枱、木架擺設……同街市檔好唔同； 200 呎空間，充滿日式咖啡小店風情。因為租金較低，Dennis 將成本都放在食物上，讓大家以街坊價食足料嘢。
食物選擇不少，好似 cafe 必備的 egg benedict、all day breakfast、窩夫都可吃到，用料認真，烹調亦不賴；像 all day breakfast，有奧地利豬肉腸、挪威三文魚；意粉用意大利黑松露醬煮，香噴噴。咖啡香濃有水準，仲有簡單拉花。呢間街市 Cafe 好快就被街坊發現，並在 fb group 廣傳，迅即有 500 Likes，令 Dennis 信心大增。誠意小店，本就值得支持。
All Day Breakfast $68 （包飲品）
市區食個全日早餐閒閒哋過百蚊，呢度 $70 唔洗包埋咖啡或其他飲品。食物用料靚，有奧地利豬肉腸、挪威三文魚、荷蘭番茄等，足料。
Latte $26
咖啡價錢公道，奶味夠濃又夠滑，落足咖啡粉唔覺淡。
黑松露野菌忌廉意粉 $45 （包飲品）
最受歡迎的 lunch set，用意大利黑松露醬煮，菇香超濃郁，意粉煮得彈牙。
洛神洋甘菊茶 $30
歐洲花茶浸出花味，洛神花的酸味配合菊花的淡雅恰到好處。
凍即磨咖啡 $18
Dennis 指客人最愛點凍咖啡，自己畀多一 shot，令味道更濃；跟餐叫都係加 $2，超抵！
Egg Benedict $58 (包飲品)
蛋黃醬用牛油、檸檬汁及蛋汁自家打，煮蛋時間掌握得好，蛋黃流心，蛋白滑溜溜。
鮮果窩夫配雪糕 $48 (包飲品)
小朋友及女士最愛，窩夫烤得外脆內軟，勁香口。
Soul Cafe
地址：深井深井臨時街市熟食中心 CF8 號舖
電話：9189 3100
營業時間：星期一、三至日 8am-6pm，星期二休息
文：Celia、攝：Chow
歡迎你 like 我哋 U Food Facebook Page / U Food Instagram ，取得我哋更新更快嘅資訊！
