Dalloyau 啱啱搬了新舖，落戶海港城港威商場；新舖走巴黎悠閒 cafe 路綫，但格調一樣咁優雅，啱晒女生 selfie。店內亮點之一係新添置嘅軟雪糕機，雪糕唔係普通牛奶味，而係黑松露及黑松露朱古力口味！當然唔少得 mix 扭紋味！可揀威化甜筒或杯裝，仲可以外賣，邊行街邊吃。
全牆畫上法國甜點的漫畫，格調輕鬆而又散發藝術氣息。
黑松露朱古力軟雪糕 $50
雪糕唧足 3 圈半，食到甜筒底都仲有雪糕！靠近鼻子即聞到菌香！黑松露雪糕夾雜粒粒黑松露碎，松露味剛好不太重，質感很幼滑。
黑松露與黑松露朱古力混合軟雪糕 $50
朱古力味跟松露味好 match，兩者皆濃，卻唔會搶大家風頭。
雪糕唔係用平價黑松露醬炮製，係用打碎咗嘅法國黑松露製成，而朱古力雪糕則嚴選 72% 馬達加斯加可可豆製作，貫徹名店揼本作風。我試過，黑松露軟雪糕係淡灰色嘅，隱約見到一點點嘅黑松露，真係好足料喎！黑松露味的確香，靠近鼻哥即刻聞到（唔鍾意嘅會覺得係煤氣味），又嗒到牛奶的甜香味，香濃得來唔霸道。個人心水喜歡黑松露朱古力味多啲，因為黑松露同朱古力一向都係好啱嘅配搭，一啖同時食到兩種味，味道好 balanced，兩者都無搶對方風頭。除咗雪糕，仲有黑松露雪糕 Affogato 和幾款黑松露雪糕特飲㗎！
黑松露軟雪糕 affogato $55
可揀 espresso 或熱朱古力，咖啡的甘與厚滑的雪糕超夾，very yummy！
新店同時新推出一系列黑松露主題的甜點，有招牌 Opera、Macaron、拿破崙等。下午茶亦加入龍蝦黑松露軟包及黑松露 Opera。至於主餐牌，增加咗唔少鹹食選擇，平日增設法式早餐，中午開始供應沙律及三文治，還有精選特級芝士。Dalloyau 粉絲，還不快快朝聖！
法式黑松露千層酥 $50/ 件 酥皮全人手製，薄脆酥化乾爽，朱古力忌廉滲溫和松露香。
黑松露 macaron $24/ 個 黑松露味相對最濃，少糖少甜。
黑松露 Opera $58 共 7 層 layers，朱古力片、雲呢拿忌廉、海綿蛋糕層層均有松露成份，幽香易入口。
芝士牛角酥 $18/ 個
新店新品，芝士味很濃郁，酥皮薄脆，咬落鬆軟。
凍櫃新增了 8 款法國芝士（$78-$248），有 Comte、 Ossan、 Fourme d' Ambert 等。
Dalloyau
地址：尖沙咀海港城港威商場 3 樓 GW3220 舖
電話：3185 8330
營業時間：星期一至五 8:30am-9:30pm；星期六及日 11am-10pm
文：Vera、攝：Brian
歡迎你 like 我哋 U Food Facebook Page / U Food Instagram ，取得我哋更新更快嘅資訊！
