數數吓，其實老夫子漫畫已有 50 多年的歷史，呢本陪伴香港人走過半個世紀的經典漫畫，今日於書報攤都可以買得到，仲由黑白漫畫變成彩色㖭！而家仲有埋主題餐廳，真係不得了！一入門口，就見到大量老夫子大番薯精品，有袋有公仔有模型，兒時回憶返晒嚟！牆上滿是經典嘅黑白漫畫同掛畫。餐廳負責人話，遲啲會於餐廳賣超經典黑白版老夫子漫畫、有關老夫子嘅書籍，甚至會請王澤老師到場搞簽名會及 workshop，令人好期待！
打扮成侍應嘅老夫子和大蓄薯喺門口迎接你！
轉個頭，老夫子換埋個大廚 look，捧住勁多食物準備招呼你喇！
櫃內有大量老夫子精品，公仔、散子包、餐碟全部都可以買走！
Q 版老夫子及大番薯造型嘅咕𠱸，攬住佢哋睇漫畫是 fans 指定動作。
餐廳內有大量老夫子蹤跡，絕對不是曇花一現！門口位置就放滿咗不同年代老夫子漫畫封面，你睇過邊期？
餐廳老闆謝海發（Calvin）是 80 後，於銅鑼灣開過同樣大賣懷舊情懷嘅電車主題餐廳。今次機緣巧合下認王澤老師，一拍即合決定開全港首間老夫子主題餐廳。裝修概念全部跟足王澤老師嘅 idea，由構思開店至試業，足足用咗成年時間，仲花咗 7 位數字做裝修，絕對唔係求其放塊紙牌當裝飾就算！
餐廳分咗 6 大主題區，掛起老夫子及陳小姐結婚照嘅係愛情為主題、牆身有大量金色老夫子剪影嘅係「耐人尋味」，以黑白色漫畫為裝飾嘅「名不虛傳」、「得意忘形」、「唯妙唯肖」及中間主餐區嘅「與眾同樂」，每一區嘅裝飾及佈置都唔一樣！
呢架唔係普通嘅私家車，其實佢係一個 4 座位嘅卡座。幾乎每位客人都有係車旁影張相、打個卡！
Calvin 話，為配合老夫子嘅形象，餐廳嘅食物走 60 至 70 年代嘅懷舊路綫，由擁有至少 40 年經驗嘅大廚，設計出阿爸阿媽年代食嘅豉油西餐！連個餐牌都是老夫子嘅大頭，粉絲表示好想 keep 番個！打開餐牌，頭盤、沙律、小食、鐵板、意粉、咖喱、素菜、甜品、飲品、特式飲品，款式超過 100 款，勁多選擇。
菜式名更搞鬼，會用番老夫子漫畫入面嘅題命名，好似「耐人尋味」即係招牌嘅瑞士汁乳鴿，「曇花一現」係雪糕、「世事難料」係凍檸檬紅茶！淨係睇番啲名，啲回憶都已經返晒嚟！
種瓜得瓜 $48
打完卡、影完一大輪相，坐低開餐喇！先嚟一碗「種瓜得瓜」，又名「老夫子南瓜湯」。大廚將日本南瓜蒸熟再打成蓉，加忌廉及奶打成。南瓜味濃郁，仲有粒粒南瓜肉，湯嘅質地好厚，但唔會有忌廉嘅膩滯感。秘密是大廚加入以大量雞骨及雞肉煮成嘅秘製上湯，令南瓜湯嘅味道帶鮮甜。
耐人尋味 $98
一睇個名就知係餐廳嘅招牌菜！呢道「耐人尋味」即是瑞士汁燒乳鴿。大廚選用 28 個星期大嘅乳鴿，肉厚又無羶味！乳鴿先以白鹵水浸 28 分鐘至入味。再以麥芽糖及浙醋抹均鴿身。風乾至少 4 小時後再炸，以「淋油」方式將滾油淋於乳鴿上，皮薄金黃又香又脆，皮脆肉嫩，咬落仍然有肉汁，證明大廚控制油溫得宜！呢隻乳鴿豈止耐人尋味，簡直令人念念不忘！
順手牽羊 $198（跟飯 / 意粉 / 薯菜）
鐵板餐簡直是豉油西餐嘅代表！羊架選用脂肪少啲嘅新西蘭草飼羊。以新鮮羅勒及雜菜水浸一個半小時後，煎香表面，再入焗爐以攝氏 180 度焗 5 分鐘。足 8 安士重嘅羊架，外面帶少許焦脆，切開後中間嘅肉仍然是粉紅色，肉質夠嫩無渣！
世風日下 $68
諗唔明點解呢個窩夫點解叫世風日下！窩夫啲蛋漿用咗低筋麵粉及蛋等製成，蛋香唔算突出，但窩夫質地鬆軟，好似食蛋糕咁！中間嘅 cream 用咗蛋白及奶，以人手打成，特別幼滑！
道高一尺 $46
呢杯飲品好吸睛！不過唔好畀相機食太耐，因為棉花糖融化速度極快！呢杯道高一尺其實是菠蘿涼粉特飲，將七喜倒落棉花糖上，等棉花糖慢慢融化之後，就可以連菠蘿涼粉一齊飲。放心，味道唔會太甜！
老夫子餐館
地址：太子彌敦道 777 號安寶樓 1 樓
電話：3702 1678
營業時間：11am - 12am
文：Jessie、攝：Ki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【限時搶⚡】Louiscocoa鳳梨啤酒口味可可即沖營養代餐奶昔！↓
↓ 首創含微量酒精代餐 / 嚴選高級可可粉 / 加水即沖即飲！↓
