一家人食 Brunch 細路免費！

中式 Brunch 請坐帆船

坐中式帆船「張保仔」遊維港不是新鮮事，但消費唔平，今次歎胡同呢個 Brunch，免費請你坐係咪幾吸引先？而家只要星期六或日，到胡同享用 Brunch，用餐前或後 15 分鐘可乘船暢遊維港。
胡同 sell 北方口味中菜，點心、北方前菜熱葷湯麵飯同甜品都可任食，另可自選一款主菜如金沙釀蟹箝、炸牛肋骨，主菜想吃烤鴨的可以加 $148 柯打半隻，加上餐廳位於北京道 1 號，有海景 view 又裝飾得古色古香，喜愛中式 brunch 的朋友可試試。

「張保仔」以中式舊帆船翻新，大人小朋友都好值得坐下。

雖然 15 分鐘短咗啲，但相比要每位畀 $130 坐 45 分鐘來說，呢個甜頭都唔錯。不單止，每位成人仲可帶同一位 12 歲或以下小童免費享用。


Brunch 備有多款北方包點任食。

胡同裝修得古色古香，仲有無敵靚景。

「豐味」Brunch
供應時間：星期六及日 12nn-3pm
收費：成人 $428/ 位（不包飲品），加 $100 無限添飲無酒精飲品，加 $200 無限添飲酒精飲品，設加一
備註︰12 歲或以下小童免費，可於用餐前或後乘坐張保仔，時間可跟餐廳查詢

胡同
地址︰尖沙咀北京道 1 號 28 樓
電話︰3428 8342

叮叮景 古蹟內鋸扒
灣仔地標和昌大押活化後成了英式餐廳 The Pawn，可望到叮叮來來往往，樓高兩層的餐廳與酒吧分別供應不同的 Brunch。1 樓 Botanicals 供應 light brunch，2 樓的 Kitchen 供應的 brunch 則比較豐富。先來 4 個頭盤 for sharing，以 Lobster macaroni cheese 最吸睛；主菜 4 選 1，除了有 brunch 鐵膽 poached egg 和 英式早餐，仲可以鋸塊西冷或者點雞，最後仲有十多款甜品結尾，都算豐富！每位成人可帶同一位 12 歲或以下兒童免費享用，小朋友仲有自己 kids' menu，選一道菜一款飲品同埋食勻十多款甜品，都唔少！

Kitchen 的格局比較 formal，有不少圓檯，好啱 weekend 聚首。


Macaroni cheese 加入龍蝦，好吸引！


甜品中的 waffles 大件得來入口鬆軟。

Set Brunch at Kitchen
供應時間：星期六及日 12nn-3pm
收費：成人 $498/ 位（任飲汽水、果汁、smoothies），加 $100 任飲 Moet & Chandon 香檳、紅白酒、啤酒等，設加一
備註︰12 歲或以下兒童免費

The Pawn
地址︰灣仔莊士敦道 62 號 2 樓
電話︰2866 3444


尖咀靚景 食肉獸 VS 海鮮怪

位於 The One 21 樓的 Wooloomooloo Prime 擁有無敵靚 view，本來已是吃 brunch 的好地方，假日有不少年輕家庭聚首，氣氛 casual 輕鬆。呢度個 brunch 好抵食，$398/ 位，可選 2 款頭盤、湯、主菜及甜品，分量幾大碟。Brunch menu 做緊 「Cow & Crustacean」主題，有多款牛肉同甲殼類海鮮，好似生蠔、龍蝦、扇貝等。星期六仲有特別優惠，1 位成人可帶同一位 10 歲或以下兒童免費享用。小朋友可以點兒童餐，包一款主菜同一款甜品，主菜都是小孩恩物，包括 burger、fish & chips、意粉等，最後來大大杯雪糕，好飽呀！

有圖有真相，高空 view 超開揚。


食肉獸主菜可以鋸扒。


海鮮怪頭盤可選生蠔或者帶子。


甜品︰蘋果批伴雪糕

供應時間：逢星期六、日及公眾假期 12nn-3pm
收費：成人 $398/ 位，加 $100 享用 2 小時果汁及汽水任飲，加 $200 可任飲紅白酒、啤酒及意大利汽泡酒，設加一。

Wooloomooloo Prime
地址：尖沙咀彌敦道 100 號 The ONE 商場 21 樓
電話：2870 0087

文：Winnie

歡迎你 like 我哋 U Food Facebook Page / U Food Instagram ，取得我哋更新更快嘅資訊！