上班族福音！超市價手握壽司盛！

最癲係 $250 晚巿就歎到 omakase（廚師發辦），對手頭永遠咁緊嘅打工仔，是拜拜劣食的福音。

這店擺明是外賣店格局，不足 300 呎的舖面，用餐區只有那條 L 字型吧枱，100 呎都無，其餘地方是壽司櫃及廚房，以為它是一般壽司外賣店，你又錯嘞，這裏不賣預早整好的盒裝壽司，運用放大鏡功能睇真啲，廚房內長期即叫即製的手握壽司。舖頭的主理人叫 Leo，咪睇輕佢年輕，其實做壽司有 10 幾年，當中有 8、9 年時間是跟隨香港老牌日本料理水車屋總廚工作，連他都說自己手法都頗老套，不過好正宗。

這間即叫即握的壽司店，收費同超巿裏的預製壽司盒差不多，$68 已可吃到 9 件壽司，唔係「機握」，由 Leo 逐件逐件握出來，壽司唔乾唔實唔散。也無將貨就價，師傅沿用以前識落的供應商，魚生來貨唔止水準穩定，仲可以賣平啲。這裏有不少靚貨都由築地入貨，如 jumbo 級的北海道帆立貝、油甘魚、兵庫縣松葉蟹膏等，仲有 5 吋長、比牡丹蝦還要大隻的厚肉阿根廷紅蝦、AA 級的菲律賓野生黃鰭吞拿魚等，間中仲有刁鑽的魚產，好似日本水母刺身、原條日本海鰻及台灣鱲魚等，來貨水準比迴轉壽司及超市高班。

講到不能不吃，並非最平，但卻極有吸引力，就是左頁的那款爆滿多料嘅海膽丼，韓國馬糞膽喺飯面同你 say hello，份量足足有 80g，見到口水流；仲有本來只為熟客訂造叫的 hidden omakase，$250 已可以吃到刺身 5-6 種、火炙壽司、燒物及湯，份量唔少，月頭可以諗諗佢喎。

壽司盛 A $68
即叫即握，新鮮度高過超巿壽司櫃多多聲，但價錢差不多。


富田丼 $88
油甘魚魚味極濃、劍魚油脂感重，吞拿魚無乜渣又爽口，加上薄切的台灣鱲魚，煙韌好𡁻，魚味清。


特選海膽丼 $158
這款每日限量供應，落足 80g 海膽，近期用的是膠盒盛載的韓國馬糞海膽，貪它沒有滲到木板味，鮮甜腍滑，入口甘味爆炸，甜味重。冬天來的時候，會換上 creamy，口感綿綿的加拿大海膽。


老闆加大廚 Leo 出身自老牌日本料理水車屋，又有御壽司及外野手工作過，握壽司跟返舊派日本師傅手法，飯大小適中又唔太散。

創壽司
地址：上環摩利臣街 8-12 號宏基商業大廈地下 8A 號舖
電話：2650 0777
營業時間：星期一至六 11:30pm - 9:30pm，星期日 1pm - 9:30pm
收費：現金及八達通，不設加一
交通：港鐵上環站 A2 出口，步行 5 分鐘
泊車：上環巿政大廈 $25 hr
平均消費：$80 - $100、omakase $250
備註：3pm - 9pm 設送貨服務，須 90 分鐘前下單，區內 10 分鐘步程範圍，購買滿 $200 元免費，範圍外須消費滿 $600 及附加交通費

文：Sieg

(原文摘自 U Magazine ISSUE 558)

歡迎你 like 我哋 U Food Facebook Page / U Food Instagram ，取得我哋更新更快嘅資訊！