日式放題、西式自助餐食得多，以粵菜做主角嘅自助餐就好少見。呢個係「喜善中菜廳」的綽頭，暑假期間限定的「片皮鴨‧海上鮮粵式自助晚餐」， 食物種類嚇咗記者一跳！
先講吓每日不同款式嘅熱盤，主打海上鮮，每天有不同款式，好似星期一就有蒜茸蒸帆立貝，隻隻有手掌咁大嘅新鮮帆立貝任食；星期二呢？有京滬乾燒蝦球，數落去仲有田園蔬菜炒帶子、白灼生中蝦等，睇下邊日踲海鮮啱你心水。星期五六日仲精采，有紅棗雪耳冰糖燕窩，可以自己出自助餐桌任添，燕窩都有得食，絕對係回本位。
逢星期一供應的熱盤蒜茸蒸帆立貝，size 手掌咁大，肉質彈牙好新鮮。
星期三晚供應「田園蔬菜炒帶子」，大大粒帶子落重本。
星期五至日供應養顏糖水「紅棗雪耳冰糖燕窩」，自己出自助餐桌任添，食多兩啖燕窩回晒本。
每晚不斷供應北京片皮鴨，新鮮香脆，不太油膩。
全場最受歡迎係北京片皮鴨，大廚阮師傅話每晚最少都要片 10 隻鴨先夠！每晚 6:30pm 就開始源源供應。即片即食熱辣辣，皮脆肉嫩。至於其他粵菜，必數清蒸大海斑，記者目測，大家見到出爐即一湧而上，轉眼間靚魚只剩魚骨，不過頻頻 refill，唔使心急。至於小炒，仲有香草燒肥牛、蜜汁燒火腿、避風塘鑊仔海鮮等；一定要試豉椒炒青口，打開蓋後即湧出香辣豉椒味，青口咬落無沙，好新鮮。仲有炒蝦仁、珊瑚蚌、貴花蚌等等，都會不時供應，碟碟新鮮炒起，超有鑊氣。
鑊仔中菜有「辣酒煮東風螺」，辣得不過份，而且螺仔大粒有肉。
雜果蝦沙律，鋪滿成碗新鮮海蝦，夏天食超開胃口。
桂花糕、芒果布甸都是師傅自家製甜點，迷你砵仔糕咬落的骰煙韌。
餐枱上竟然搵到龜苓膏，果然係粵式自助餐。
清蒸大海斑最受客人歡迎，至於炒珊瑚蚌等海鮮則不時供應。
除了粵菜，仲有日式刺身如三文魚可選擇。
橙汁免費供應，茗茶 $10/ 位，啤酒汽水 $28/3 罐。
環境像一般中菜廳。
其實九龍灣 Emax 唔算僻，到港鐵站轉免費穿梭巴士 10 分鐘內到，但而家食自助餐仲請埋你搭的士。即日到 8 月 31 日（逢星期一至四） 晚市時段惠顧滿 $300，再出示當天的士單據正本，即可在帳單上回贈 $30，每枱客人只可使用優惠一次及一張的士單據。食飽飽，仲有人請搭車，滿足了！
「片皮鴨‧海上鮮粵式自助晚餐」
收費：星期一至四 成人 $208、小童或長者 $138；星期五至日 成人 $238、小童或長者 $158（設加一）
註：凡 4 至 5 位訂座可享 8 折；6 位或以上可享 75 折 （另加一服務費以正價計算）
喜善中菜廳
地址：九龍灣展貿徑 1 號國際展貿中心 3 樓
電話：2620 2312
文：Celia、攝：Ki
歡迎你 like 我哋 U Food Facebook Page / U Food Instagram ，取得我哋更新更快嘅資訊！
