我講緊嘅係尖沙咀隆堡麗景酒店咖啡亭嘅下午茶自助餐。呢個 tea buffet 嘅食物款式唔少，頭盤、沙律、凍海鮮、刺身、熱盤和甜品樣樣齊，作為下午茶都算多，起碼海鮮控、甜品控抑或餓底都揀到心水。
給「海鮮控」
一向以為 tea buffet 冇乜海鮮，但隆堡酒店總廚陳師傅就話咖啡亭一定至少有 4 款海鮮坐鎮：蝦、青口、翡翠螺及小龍蝦！試食當日，小編眼見海鮮顏色光鮮，感覺新鮮，中蝦好彈牙，小龍蝦則夠鮮甜。除咗凍海鮮，仲有 4 款刺身，包括加拿大三文魚、日本八爪魚、鯛魚及油甘魚，件件都係厚切，食到魚味，魚油脂味好濃。熱食亮點係香煎龍脷柳，大把回本位！
至於生蠔，就只得 dinner buffet 先有，可惜！不過唔好失望，因為食完 tea buffet，可以免費 join 開蠔班，由咖啡亭大廚教授一啲生蠔小知識同開蠔秘笈，參加者仲可自己即開即食半打生蠔！上完開蠔班之後更可以拎走一把開蠔刀及繡有客人名字嘅心思毛巾一條，so sweet！以後 order 生蠔，自己都識得開啦！
給「甜品控」
陳師傅話嚟食 tea buffet 嘅客人大部分都主攻甜品，所以甜品款式好多，包括燕窩燉蛋白、Macaron、鮮果撻、Tiramisu、朱古力蛋糕、木槺布丁、藍莓芝士蛋糕、鮮果泡芙、朱古力 fondue、即叫即製 pancake、果仁朱古力等等。最正係雪糕機，客人可自己唧雪糕，扭 4、5 個圈都無問題，旁邊仲有 toppings 任加，好玩！（當然，最最最緊要係唔好浪費，咪做「大嘥鬼」！）
給「餓底」
餐廳有不少飽肚嘢，如即叫即煮嘅意粉 live station，麵款醬汁任你揀！另有干燒伊麵、中式點心、蒸炸饅頭、本地生滾粥、烤羊架、炒薯仔、咖喱牛肉配薄切麵包等，保證一定食得飽，唔好食 lunch 嚟啊！
咖啡亭
地址：尖沙咀赫德道 8A 隆堡麗景酒店 1樓
電話：3550 0275
供應日期及時間：星期一至五 3pm-4:30pm；星期六、日及公眾假期 3:15pm-5pm
收費：$288/ 位，設加一
註：
(1) 開蠔班須 3 日前預訂，並需全數預付。
(2) 每班限 8 位參加者，先到先得（參加者需年滿 12 歲）。
(3) 自助下午茶單一收費為：星期一至五 成人 $178/ 位、小童及長者 $138/ 位；星期六、日及公眾假期 成人 $218/ 位、小童及長者 $158/ 位
文、攝：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
