各位食肉獸 mark 住喇,呢間日式燒肉放題店叫「牛八」,午市提供燒肉套餐,晚市就做120 分鐘燒肉放題。認知中嘅燒肉平價放題,肉類質素一般,呢度就分得好仔細好均真,分 4 個收費:最平 $198(任食豬肉及雞肉)、$248(任食牛 + 豬 + 雞肉)、$298(任食海鮮 + 牛 + 豬 + 雞肉)及 $888(任食和牛 + 牛 + 豬 + 雞 + 海鮮)。有平有貴任人揀,放題仲包 12 款自助前菜沙律吧、多款和食、飯麵、甜品、湯、汽水及咖啡,超多選擇!
店內以卡位為主,有空間感,坐得舒服。
最正當然係最貴的「和牛放題」,$888/ 位,價位實在好嚇人,不過知道用料,就覺得物有所值!可以任食兩款高級 A4-A5 級日本宮崎牛,話晒宮崎牛在 2007 年和牛奧運會成為了「冠軍牛」,更贏得內閣總理大臣獎,質素一向高,平日喺餐廳食,起碼一千幾百,而家竟然可以任食!貨真價實,其中一款宮崎黑毛和牛肉眼,仲大過你塊面,霜降油花均勻,肉味和油香都好澎湃,放燒爐上燒時特別火光熊熊;另一款宮崎黑毛和牛牛肋肉,紋理分明,肉質細膩,好好食!
宮崎黑毛和牛肉眼
大大塊!油脂均勻,甘香 juicy。
(前)宮崎黑毛和牛牛肋肉、(後)鹽醬鮭魚
牛肋肉屬高級部位,牛味濃厚,夾雜啖啖脂香。三文魚放於錫紙盒上燒,不怕黏爐,肉質細嫩,鹹鹹香香。
切得厚薄均勻,油花突顯。
除咗日本牛,亦可任食澳洲和牛舌及澳洲和牛牛肋肉,花款多之餘,質素亦不錯!即使是美國牛肉,也有多個不同部位、不同厚薄食法,包括牛腹胸、牛五花肉、肩脊肉、一口牛肋肉、上級牛肋肉等,同樣是牛肉,卻吃到不同風味。
澳洲和牛牛肋肉
富牛肉口感,具彈性;牛味適度。
海鮮
有海老、三文魚、魷魚及帶子,選擇多之餘,都算新鮮。
胡麻炸雞
食肉獸必點!炸雞外脆內嫩,配芝麻醬香口惹味。
擦完牛肉,已經大半飽,提提你一定要留肚食其他東西,不可錯過有 1cm 厚切加拿大豬腩肉、味噌豬大腸、柚子生薑雞腿肉,仲有海老、三文魚、牛油帶子等海鮮,以不同醬汁醃過,入味之餘,唔會款款一樣味。食物可以逐片柯打,每款試少少,滿足到貪心的慾望!吃得盡興,加多 $40 又可以任飲日本 Kirin 生啤及清酒,真係飽到癲呀!
石鍋雪糕伴乳酪
用日本 A1 呍呢拿雪糕混合 yogurt 及雜莓醬,微酸醒胃,以石鍋載住,夠冰凍!
120 分鐘放題收費:
燒肉放題(任食豬肉及雞肉)
(星期一至五) 成人$198、長者 / 小童 $158 ,(星期六及假日)成人 $218、長者 / 小童$178
牛八放題 (任食牛 + 豬 + 雞肉)
(星期一至五) 成人 $248、長者 / 小童 $208,(星期六及假日)成人 $268、長者 / 小童$228
極上放題(任食牛 + 豬 + 雞 + 海鮮)
(星期一至五) 成人 $298 、長者 / 小童 $258,(星期六及假日)成人 $318、長者 / 小童$278
和牛放題(任食和牛 + 牛 + 豬 + 雞 + 海鮮)
每位 $888,現有優惠(4人享用,3人價錢),須 2 日前預約。
備註:同枱客人須點同一級別放題,另收加一
牛八和牛燒肉屋
地址:銅鑼灣霎東街 33 號 Holiday Inn Express 3 樓
電話:3584 7854
營業時間:星期一至五 12nn-11pm,星期六、日及公眾假期及前夕 11:30am-11pm
文:Vera Gee、攝:Nova
歡迎你 like 我哋 U Food Facebook Page / U Food Instagram ,取得我哋更新更快嘅資訊!