裝修差不多 4 個月，黃埔的 Aeon 重新登場，更改名為 Aeon Style。身為飲食特派部隊，第一時間走去 food court 睇睇有乜好食。座位舒適，更增設自助購及飲水機服務，食店比以前多咗，但望來望去，店舖都幾熟口熟面，啊！喺早前翻新嘅太古 Aeon Style 見過！
最吸引我眼球的，係一間專售玉子燒的店舖，叫「宗田屋」。遠遠走近已聞到陣陣蛋香，仲有陣甜味！玉子燒有 5 種選擇咁多！傳統的原味、三文魚、明太子，較新派的有櫻花蝦，而芝士火腿我覺得有啲港式！好特別！
全部即叫即整，買完可近距離睇住師傅煎煎煎，香噴噴食慾大增！玉子燒端來新鮮熱辣，食落鬆軟不死實，中間仲有蛋汁咇出嚟！蛋香中透出陣陣鰹魚甜香。就算放耐啲，美味依然！客位吃貨，又係時候出動喇！
接到柯打，師傅即場炮製，陣陣蛋香傳來，好吸引。
每份玉子燒都有 3/4 隻筷子般長，分量十足。
玉子燒明太子 $56
宗田屋選用水質最靚的土佐清水市製作的鰹魚汁來炮製玉子燒，食落確係唔同，味道更鮮甜，蛋味香濃突出，加上滿瀉的明太子餡料，鹹鹹哋帶微辣，很開胃。
玉子燒櫻花蝦 $56
櫻花蝦滿布在玉子中，啖啖蝦味，脆脆好甘香。
玉子燒芝士火腿 $56
外間少見的口味，芝士與玉子根本就是絕配，既鹹且甜，煎好後半融狀態更吸引，加上火腿做餡，有種食奄列的感覺。
全新裝修黃埔 Aeon Style 的 food court，地方寬落座位多，食店種類選擇亦比以前多，而且更增設增設自助購及免費飲水機服務。
宗田屋（Aeon Style 黃埔店）
地址：紅磡黃埔新天地第 5 及 6 期地面及地庫
營業時間：（Food Marche）8:30am- - 10:30pm、（其他）10:00 - 22:30
電話：2627 6688
網址：www.aeonstores.com.hk
文︰Theo
歡迎你 like 我哋 U Food Facebook Page / U Food Instagram ，取得我哋更新更快嘅資訊！
