由元朗入屏山，搭程輕鐵就得，其實幾方便。呢條屏山文物徑唔算長，一路行仲可見坑尾村等傳統建築，當然少不了係探吓元朗最大家族鄧氏個祠堂。至於食嘢，去到屏山，依家唔食盆菜唔食華嫂，都仲有不少新穎選擇。
shop1 鄧達智主理優質茶記
著名時裝設計師鄧達智是屏山人，近半年他在屏山開設一間好有自己 style 的 Cafe。成間店用上 sharp 醒黃色，好易找。這裡午市做茶記美食，晚上食私房菜，做的是懷念鄧媽媽的家常工夫菜。
雖說是茶記美食，卻好高質素，看似普通的咖喱雞翼飯，用的是爪哇 style 咖喱，特別加入煎香的番薯，甜度變得有層次，連飯都加入香茅去煮，香味獨特，咖喱汁甘甜。這裡也供應芝士蛋菠蘿包，是菠蘿包夾炒蛋，用上成本最高的荷蘭蛋，入口蛋靚又嫩滑。好多人都知鄧達智曾留學意大利，因此他好緊張店內的咖啡，用上最喜愛的蘇門塔臘咖啡豆，以 MOKA 壺去沖，直頭有咖啡店質素。
有得十個人，可以考慮預訂晚上的私房菜，都是他媽媽的拿手菜，元朗基圍蝦浸勝瓜、酒香神仙鴨、元朗凍烏頭、炒蒸南乳雞飯……都是好元朗的菜式。
黑松露炒蛋厚多士 $32
白麵包夾著芝士烘香，炒蛋只用荷蘭蛋，貪其蛋香濃郁。用慢火慢慢炒熟後，才加入意大利黑松露醬，幽香自然。
鹹牛肉芝士蛋菠蘿包 $22
菠蘿包內是炒蛋牛，炒得嫩滑。
熱咖啡 $12
用上印尼蘇門塔臘咖啡豆沖成，入口醇厚但不掩豆香。
咖喱雞翼米粉 $32
印尼友人祖傳咖喱秘方，口味是偏甜、香茅味突出的爪哇風格，可以跟飯，或用來撈米粉也出色。
酒香神仙鴨（私房菜菜式）
將冬菇、大頭菜等醃料，以及一小杯玫瑰露酒釀進鴨身，再連同陳皮蒸熟。捧出來酒香四溢，齒頰留香，肉質嫩而不羶。
貌似茶餐廳格局，但乾淨企圖，冷氣也充足。
Café 123食堂
地址：元朗屏山塘坊村 123 號
電話：9195 4884 （只限 WhatsApp 聯絡及預訂）
營業時間：星期一至六 8am-5pm（星期日及公眾假期休息）
備註：中式私房菜 $4,000/ 圍（每圍 10 人，每增一位加 $400）
shop2 低調高手拉麵店
入屏山食拉麵，唔係嘛？係！仲有好推介！呢間拉麵店的老闆娘兼大廚 Chris 是個拉麵癡，她在日本唸大學、工作、做生意，在日本最愛食的就是拉麵。她特別向東京拉麵店老師傅學習煮拉麵，學懂基本功，再做出自己的口味。
店子供應 6 款拉麵，鹽、醬油、白味噌、赤味噌和番茄拉麵，都是屬於豚骨魚介系，還有零丁的鰹魚醬油拉麵。先試用豬骨魚介湯底，再加入 4 款日本粗鹽做成的味油，突出了鰹魚香和豬脂，與坊間的死鹹截然不同﹔嗜辣的，可以柯打赤味噌吧！望上去一片紅，喝一口湯，微辛感和肉醬香好有餘韻。靈魂豚骨魚介湯底，Chris 以 30kg 的豬筒骨熬足 12 小時，味道好濃縮，再拌入鹿兒島鰹魚、銀魚仔、日高昆布煮成鰹魚湯，加起來只夠賣一百碗。要讚的仲有拉麵，直麵送來後再花時間搓至孿曲，咬落更 Q 彈，嗦湯速度也快一倍。
鹽拉麵 $68
用豬骨魚介湯底，再加入 4 款日本粗鹽做成的味油，突出了鰹魚香和豬脂，與坊間的死鹹截然不同。
醬油拉麵 $68
用 5 款日本醬油調成，醬油鹹香複雜，突顯湯底的肉香和魚鮮，極有層次，令人深刻。
煎餃子 $26
堅持自己包，豬肉、韮菜、葱、蒜、麻油等作餡，一口大小的，再將兩邊煎香
山椒烤雞翼 $32
巴西雞翼一開二，做成單骨，再用日本山椒和柚子粉醃到入味，收到柯打才炸香。先吃到柚子香，然後是霸道的山椒湧上來，麻香持久。
小町
地址：元朗屏山坑尾村 85 號地下
電話：2316 2988
營業時間：星期三至日12nn-9pm，星期一及二休息
shop3︰ 法拉利跑車 Cafe
比鄧達智間 cafe 更搶眼的，有呢間門口頂住架紅色跑車的 cafe，原來老闆是鄧達智的堂弟，而且係一個超級跑車迷。一進店，就可以感受到他對跑車的熱情 ── 賽車紅綠燈、紅黑賽車座椅、黑白賽旗地板，還有用真呔鈴打造的玻璃枱，以及收藏多年的法拉利模型車、拼圖，侍應都穿上賽車 Tee，鋪天蓋地都是跑車賽車，成間舖都係影相位！
食物為配合主題，以烤焗的西式肉食為主，如燒牛肋骨、燒春雞、炸魚薯條等，也少不了沙律、薄餅、意粉、甜品等，共廿多款，由五星級酒店西廚 Sam 哥主理。兩磅重的燒牛肋骨，是每枱必點的招牌菜，因為大份夾抵食！用上美國 Prime Grade 穀飼牛肋骨，收到柯打，才用百里香醃一醃，放進焗爐燒至 medium rare，蘸上用牛骨、紅酒熬成的燒汁，更加 juicy，難以相信只賣 $138！大廚在肉食菜式都配上好多蔬果，唔想食肉咁 heavy，亦可試呢度的炸魚薯條或者 pizza，也做得有驚喜。飲品 menu 可找到老闆的飛佛，3 款用跑車牌子命名的特飲，包括林寶堅尼、法拉利、麥拿倫，配嘢食一流！
燒牛肋骨 $138
抵食夾大件，美國Prime Grade穀飼牛肋骨份份重2磅，用多款香草輕醃後，便用焗爐280 度燒足 10 分鐘，上枱前還仲切成一件件，好貼心！配上紅酒燒汁，啖啖juicy。
炸魚薯條 $98
越南鯰魚柳沾上啤酒粉漿後炸至金黃色，配自製他他醬。薯條切得粗身，用牛油煎香才炸起，好吃得令人停不了口。
露絲瑪莉燒春雞$98
用上原隻重近 1kg 的法國有機春雞，醃上一日，收到柯打才裝上直身架焗 15 分鐘。皮薄肉嫩，底下有好多新鮮番茄、翠玉瓜等新鮮蔬菜。
賽車手薄餅 $78
10 吋薄餅鋪滿意大利辣肉腸、火腿、車打芝士、水牛芝士及巴馬臣芝士，熱辣辣食可拉絲。
歡迎你 like 我哋 U Food Facebook Page / U Food Instagram ，取得我哋更新更快嘅資訊！
