香港限定！日本蜜瓜芭菲 UFUFU Cafe
踏入秋天，日本的溫室網紋蜜瓜最香最甜，UFUFU Cafe 就將當造蜜瓜設計成 3 款甜品：特盛日本溫室蜜瓜布丁芭菲、日本溫室蜜瓜梳乎厘班戟及日本溫室蜜瓜芭菲， 3 款都係香港店限定，日本都食唔到㗎！
特盛日本溫室蜜瓜布丁芭菲 $250
當中最搶眼嘅一定係用半個蜜瓜製嘅豪華芭菲「特盛日本溫室蜜瓜布丁芭菲」，半個蜜瓜啖啖柔軟果肉，好香好甜！加上北海道牛乳 3.6 軟雪糕、日本蛋製布丁，再鋪上士多啤梨、蘋果及橙，睇落已經好繽紛，咁豪嘅份量要 2 至 3 個人先食得晒。
UFUFU Cafe
地址：尖沙咀金馬倫道 5 號太興廣場 5 樓
電話：2711 6117
營業時間：星期一至四及日 12pm-11:30pm、星期五及六 12pm-12mn
韓國蜜瓜冰屋？！ 小火焰韓式咖啡餐廳
蜜瓜雪花冰用原隻韓國蜜瓜，size 有成個頭咁大，Cafe 老闆話韓國蜜瓜味道勝在香甜，卻又不會死甜，果肉水份及果汁特多，有爆汁效果！
原隻韓國蜜瓜雪花冰 $138
蜜瓜先切開一半挑空果肉，放滿濃濃奶香嘅雪花冰，再放上香甜芝士餅，最後蓋上蜜瓜肉，勁有分量！老闆建議先試食蜜瓜，再倒上適量煉奶，可以按個人喜好調校甜度。舀一口濃郁奶味雪花冰，再咬一口半融芝士餅，感覺超幸福！注意，由於分量足料，兩位女士可能食唔晒，3 位或以上朋友去食就最 perfect。
小火焰韓式咖啡餐廳
地點：觀塘觀塘道 410 號觀點中心 1 樓 1 號舖
電話：3549 6060]
營業時間：11am-10:30pm
註：韓國蜜瓜雪花冰供應時間為星期一至五晚市、星期六及日全日供應。
半個蜜瓜 + 軟雪糕 + 洋菓子波波 御前上茶
義式水果冰淇淋 $148
用半個蜜瓜載住雪糕唔係新鮮事，你睇呢個甜品，半個哈密瓜上面放滿粒粒 gelato 洋菓子波波同軟雪糕，感覺超夢幻！
義式水果冰淇淋可按個人喜好選擇蜜瓜或哈密瓜，呢啲波波其實係將水果以 gelato 嘅方式製成洋菓子，果味重又健康。Gelato 有芒果、香蕉、哈蜜瓜、紅火龍果及蜜瓜 5 款口味，而軟雪糕都有芒果、抹茶、焙茶、豆腐及紫薯味，半個瓜又可揀蜜瓜或哈密瓜，突然選擇困難症發作！
御前上茶
地址：廣華街 13 號廣輝大廈地舖 2 號
電話：2448 6738
營業時間：星期一至五 3pm - 11:30pm，星期六及日 2:30pm - 11:30pm
港版原個蜜瓜雪糕 松記糖水店
蜜之戀人 $69
蜜之戀人賣相都幾靚仔，蜜瓜目測多過半個，店方無特別表明用咗咩國家出產嘅蜜瓜，雖然蜜瓜肉唔係爆汁，但好甜好香蜜瓜味！蜜瓜波波，味道清甜，一口一粒，食得一啲都唔狼狽。中間的雪糕球味道可以自己揀，小記覺得呍呢嗱曲奇味雪糕，唔會搶走蜜瓜香。
食晒頂層嘅雪糕及蜜瓜，入面原來放咗粒粒椰果同水晶粉條。不過水晶粉條無乜味道，建議大家留少少雪糕伴食！其他嘢食㗎，係細細粒嘅椰果！爽彈又帶點煙韌，可以豐富口感。唔好掛住食配料呀！
松記糖水店
地址：深水埗元州街 162-188 號天悅廣場 CB3 舖
電話：2387 7819
營業時間：2pm-1:30am
文︰Louise
歡迎你 like 我哋 U Food Facebook Page / U Food Instagram ，取得我哋更新更快嘅資訊！
