Hit 爆旺角！超多汁揀金黃炸蛋
開業無耐嘅「彈彈旦」，只供應純白色原味手打魚蛋，以及帶微黃嘅天婦羅金黃炸蛋 2 款選擇，同我哋食開齋一種黃色好唔同。純白魚蛋原汁原味，金黃炸蛋脆卜卜。醬汁花款更多，有初榨椰子油咖喱汁、BBQ 肉鬆烤醬汁、蒜香香辣汁、黑胡椒海鮮醬汁及芝士黑椒汁等，心大心細，款款都想試下。
初榨椰子油咖喱汁魚蛋 $20/10 粒
魚蛋雖然細細粒，但好彈牙，有點似潮州魚蛋，有魚味卻不覺腥。配上自家調製的緬甸咖喱汁，屬小辣程度，咖喱香及椰子味極香濃，食完兩種味道仍會留在口中唔散，正！
日本天婦羅金黃炸蛋 $20/10 粒
即叫即炸，是店內人氣之選。魚蛋沾咗粉漿炸，但粉漿超薄，無影響口感，好食！若嫌單調可加 $2 配任何一款醬汁，圖中所配的是新研製的芝士黑椒汁，芝味雖香，可惜食落比聞起來有距離，完全唔覺有黑椒辛辣味，如果兩者的味道能強烈啲就更好。
彈彈旦
地址：旺角廣華街仁安大厦地下 14D 號舖
電話：9106 6530
營業時間：11am-11pm
美貌與智慧並重！港姐大賣高質魚蛋
講起魚蛋，點可以唔提由前港姐冠軍譚小環開嘅「渣哥一九九六」呢？食物選擇多，魚蛋、燒賣、腸粉、熱狗、碗仔翅、生菜魚肉樣樣齊，就連撈麵及黯然銷魂飯（餐蛋飯）都有，當然啦，魚蛋係必食，聽講最勁試過日賣一萬粒魚蛋燒賣。
魚蛋頗彈牙，自家調製的醬汁香辣惹味，必食。
渣哥一九九六
地址：銅鑼灣渣甸街 30 號 B 舖地下
電話：2420 0678
營業時間：7am-11pm
長洲代表！大大大魚蛋
將魚蛋變做大大粒，就不得不提長洲大魚蛋啦，hit 到連外國遊客嚟到都一定要食！不過長洲呢間東源小食店就再特別啲，口味除咗有大路咖喱味，仲有黑椒、青咖喱、梅汁等。最開心就係一串兩粒，可以揀唔同口味，一次過滿足吃貨兩個願望。
魚蛋果然好大粒！
長洲東源小食店
地址︰長洲海傍街 30 號後座地下
電話︰2981 9683
葵廣最抵食！$1 逐粒買！
今時今日，居然仲有 $1 一粒魚蛋！有！喺葵廣！睇埋個裝修，好似舊式鐵皮檔口咁，真係以為自己時光倒流 20 年！呢度嘅魚蛋，唔止 $1 粒，仲可以逐粒買，吃多吃少豐儉由人。
見到啲脹卜卜嘅魚蛋喺個爐度浮浮沉沉，好想食！面皮厚問老闆最少買幾多，佢話一粒都會賣畀客人！今時今日咁嘅服務態度，真令人感動！味道都不錯的。
全記
地址：葵涌廣場 2 樓潮流廊 2007 號舖
電話：從缺
營業時間：12nn-10pm
24 小時食到！長洲爆芝大魚蛋
設於通宵小巴站頭，不愁無生意！呢間店不只款式多，小食、主食樣樣齊，有飽肚嘅「蝦球芝士伊麵」，又有懷舊嘅「油糍」、「酸甜蘿蔔」及「麻辣小食」等等，不過最開心應該係見到呢個可以爆芝嘅炸長洲芝士大魚蛋，齋睇賣相與普通長洲大魚蛋相若，但一食就有爆芝效果，正！
炸長洲芝士大魚蛋 $15/2 粒
近 2 吋嘅芝心長洲魚蛋即叫即炸，加埋芝士汁，香口不俗。
香港阿姐街頭小食
地址：太子弼街 49A 地下（通菜街交界）
電話：34871887
營業時間：24 小時
文：Joyce
歡迎你 like 我哋 U Food Facebook Page / U Food Instagram ，取得我哋更新更快嘅資訊！
↓【免費送🎁】微熱山丘全新造型香蕉窩夫餅乾禮盒100盒！↓
↓ 進駐香港十週年大贈送│送埋香港獨家限量版布袋～↓
↓【必收藏】最新深圳食買玩攻略！↓
↓ 大灣區一小時生活圈！最新打卡熱點／熱門美食等！↓
