餐廳地方雖小，但感覺 cozy。
潮流興玩流心芝士，幾乎 Hit 中呢個 keyword 嘅食物都會在網上爆紅，諗諗吓，流心芝士撻、麵包、pancake 統統都試勻，仲可以有咩可能性？最近就在銅鑼灣希雲街一間新開嘅 café 發現店主 Natalie 竟做出 流心芝士 Fish & Chips，真係估佢唔到！
好日特製芝士流心炸魚薯條 $98
呢碟招牌 Fish & Chips，製法好多工夫，龍脷柳先片開，再釀入車打芝士片，再沾啤酒漿炸。卡嚓一聲切開，半融狀態的車打芝士緩緩流出，好治癒！金黃外皮非常香脆，內裏肉嫩 juicy，仲食到暖暖的鹹香芝士漿，邪惡得來令人感動！
拔絲芝士黑松露多士 $62
除咗流心版 Fish & Chips，芝士控必試店子的拔絲芝士黑松露多士，加咗大量的黑松露醬、mozzarella 同車打芝士焗，鹹香惹味，拉絲效果一流！
厚切鴨胸配自家製紅酒士多啤梨醬意大利包 $78
即使唔特別鍾意食芝士，嚟到都有好多其他用心製作嘅選擇，呢個大大份嘅三文治，夾滿厚切法國鴨胸，軟嫩得嚟仲唔油膩，連醬汁都係試過十幾款配搭後先選出呢款，用紅酒、新鮮士多啤梨同士多啤梨醬做，酸酸甜甜非常開胃。
好日特製椰香香蕉饅頭配雪糕 $65
自家製甜品好有趣，好似呢個「冬甩」甜品其實係廚師阿 Kit 拿手嘅椰香饅頭，搞鬼咁做成冬甩形，裏面夾着自家打的甜忌廉和焦糖香蕉，上面再淋上炸饅頭個 best friend——煉奶，又 cute 又好味。
黑糖薑母龍眼紅棗茶 $48
天氣漸涼，飲品不妨點杯黑糖薑母龍眼紅棗茶，唔係用現成黑糖薑茶磚，而係用足料的黑糖、薑、圓肉、紅棗煲足 2 個鐘，上面仲加咗層暖暖嘅綿滑奶泡，香甜夠薑又夠哂 warm。
GoodDay Cafe
地址：銅鑼灣希雲街 12 號地舖
電話：3704 7936
營業時間：星期日至四 11am-9pm，星期五及六 11am-11pm
文：Amy 攝：Jay
【自助特攻】放蛇試！宵夜平食燒肉放題 抵唔抵？
【今期必試】用力啜！舌尖上的神奇湯包
歡迎你 like 我哋 U Food Facebook Page / U Food Instagram ，取得我哋更新更快嘅資訊！
