送畀寵物 超夢幻 3D 蛋糕

經過荃灣大河道，會被一間歐陸粉色裝修店舖吸引住，敞大玻璃櫥窗擺放了幾個 3D 輕黏土狗公仔蛋糕，感覺好夢幻，好唔似荃灣。睇真啲，呢間叫「寵‧愛點 Petisserie」的舖頭係專售寵物食品。2011 年時由網店起家，老闆 Sherona 最初接網上訂單專製作 3D 翻糖模型寵物蛋糕，因為將狗狗造得維妙維肖，翻糖模型又可 keep 來做裝飾擺設，好受寵物主人歡迎，曾試過一星期要做 40 個蛋糕。發展下來，去年 9 月就搵到荃灣現址開店，除模型，更推出不同種類的寵物健康小食。

【相關連結】 3 分鐘搞掂！簡單自製喵星人美食

店內裝修維持粉色歐陸風格，店內好寧靜，與街外人多車多感覺好隔絕。

層架上放滿 Sherona 自製的寵物健康小食，有些是鱷魚肉、青口、牛鞭潔齒骨等，坊間少有。

店舖設計充滿夢幻風，老闆將最愛的粉紅及粉綠色融入設計中。

店內還有寄賣 corner ，不時有網店將寵物產品放在這裏寄賣。

咪以為 3D 寵物蛋糕，上面嘅公仔係食得，錯！3D 公仔模型其實係輕黏土製成，只作擺設之用，主人可以拎出模型底下嘅真．蛋糕畀寵物食，而上層嘅模型可以永久保存。雖然輕黏土更易於存放，但 Sherona 則鍾情於翻糖模型，覺得質感始終最實在，大概是手作人的堅持吧。

最基本以 3 吋大的 3D 蛋糕為例，價錢 $420 起，最大 size 蛋糕收費至 $1,000 左右；而圖中以森林、卡通人物等額外造型設計，則另加 $100 至 $200。　

如果家裏有幾隻狗狗，想在蛋糕上多加個模型，每一隻狗另外加 $160 。

夢幻水晶球，額外加 $60（細）或 $80（大）。

【得意食玩】 有得食有得玩！名牌朱古力 + 動物紙偶

至於寵物真正食落肚嘅蛋糕，可以選擇 自家製羊奶乳酪芝士、 南瓜麥麩及 紫薯蘋果 3 種口味，同時混入一種肉類製作，最普遍係雞、鴨、鹿、牛、三文魚肉，如特別要求亦可加兔肉、馬肉及鱷魚肉。3D 模型到蛋糕都係由 Sherona 自家製，以用全天然榔子粉取代麵粉，不含麩質，配合動物腸胃需要，符合健康原則。小店仲有好多坊間少見寵物零食，例如對呼吸系統有益鱷魚肉、對關節有益青口，補充額外營養的動物內臟、鮮食包等等，食得 pro 可以入店內大開眼界。

兔仔造型曲奇，主要由肉乾製，寵物可食用。$38/ 塊、$68/2 塊、$88/3 塊、$108/4 塊

呢幾款冷凍小食放雪櫃可保存 3 日，寵物進食前攤凍即可。 狗狗馬卡龍（左上） $58、 法國鴨胸羊奶芝士味 Pizza $48（右上）、 日式鯛燒魚 （西班牙沙甸魚、野生三文魚）（左下）$38、 Signature Paw Pie（鹿肉 + 有機甜薯）$58（右下）

Bone Broth Jello 以新西蘭羊骨湯、羊肉、花膠及有機海藻淆製（前） $48； 手繪無麩蒸蛋糕（雞肉 + 羊奶芝士） $42

Freeze Dried 青口 $196（150g）、$98（70g）

冷凍風乾技術製作的小食，放入零下 60 度的冷凍機製作 2 至 3 日，其好處比低溫風乾的小食更能保存營養，濕水後便還原為生食，令寵物吸收更好。

Freeze Dried 紐西蘭草飼牛脾臟 $168 （70g）

在香港養寵物大多1 至 2 隻，買一大堆內臟回家自製小食，食一、兩餐就變壞很浪費，買風乾小食最方便。

【秋冬出遊】 達人教整 露營韓日美食

低溫風乾南非鱷魚肉 $98，對有氣管問題的寵物有益，呢款松鼠狗。

最受寵物歡迎的 羊奶芝士鴨肉圈圈 $98，充滿芝士與奶香。

狗用潔齒骨好多時用牛筋，脂肪含量高；店內皇牌則 有草飼牛牛鞭潔齒骨取代，無咁肥。 （S-XL $78 - $88）

如果主人自製寵物鮮食餐，可加入 SmartBarf 脫水天然菜粉 （左） $140，幫助吸取更多纖維營養；而 德國膳全營養粉（右） $108，則有效平衡鈣鏻比例。

店內又有售 鮮食包，方便想給寵物餵鮮食又太忙碌的主人。

寵．愛點 Petisserie

地址：荃灣大河道 59 號卓明大廈地下

電話：3956 5323、9159 1235

營業時間：星期二至五 2pm-9pm，星期六 12pm-9pm，星期日 12pm-8pm（逢星期一休息）

註：訂 3D 模型寵物蛋糕，宜預早 1.5-2 個月前預訂。

文：Celia、攝：Jay

【本周焦點】 熊本祭開催 部長變身火鍋店長！

【今期必食】 童年滋味 vs 抹茶狂熱？宇治抹茶奶油包