試食專員
（左）中西千尋、（右）佐藤花奈美
今次搵來兩位日本美女當試食專員，她們分別來自四國及北海道，居於香港，現於日本國家旅遊局工作。今次佢哋的任務，係要一日走勻 4 間抹茶專門店，試食抹茶雪糕後，畀出最真嘅日本人意見，辛苦晒！
一杯好食嘅抹茶雪糕，應該是……
今次 battle 唔係淨係食抹茶軟雪糕咁單調，要食就要食得豐富啲，一於食有紅豆、白玉丸子伴抹茶雪糕嘅雪糕杯！食雪糕之前，先講吓一杯正到爆嘅抹茶雪糕杯應該具備乜條件！
1 雪糕味道：抹茶味最重要，茶味突出，濃郁而不苦澀，如果帶有茶味回甘為佳。另外，茶味與牛奶嘅比例要恰到好處，落奶太重雪糕會滑啲，但抹茶味就無掟企！
2 雪糕質感：雪糕以順滑為佳，不能有太重嘅冰感，如果食到有結成細小冰粒，會嚴重影響口感。另外，太易融都要扣分，未食晒就變 matcha latte 是多麼無癮！
3 配料：我認我貪心，配料款式愈多愈好！仲要計埋質素，紅豆有沙且甜度適中、白玉丸子煙韌軟糯，脆米脆卜卜。
4 分量： 雪糕轉多個圈、配料多幾粒，獨食過癮，同朋友 share 仲開心。
5 賣相：食抹茶雪糕，梗係要影張相、放上網等 frd 子葡萄吓啦！雪糕要挺身，配料顏色要襯得靚，擺放整齊。
京都百年老號│京林屋│17.5分
銅鑼灣嘅京林屋開業一年了！京林屋來自日本京都，同樣是擁有過百年歷史嘅老字號！品牌於 1753 年創立，成立初期只是一間於金澤市嘅製茶公司。直至 1902年 轉到宇治並於宇治區清和園自設自家茶園種植抹茶，繼而創作各款甜食。香港店所用嘅抹茶粉、糖、蕨餅粉等全部由日本直送 ，由香港店的廚師每日即製，唔怕甜品搭完飛機影響質素！
香港限定芭菲 $98
香港限定甜品，同時食到抹茶軟雪糕、抹茶啫喱、白玉丸子、寒天、新鮮水果、紅豆等。
抹茶軟雪糕嘅質地 creamy，抹茶味濃郁帶回甘，不過融化嘅速度比較快，相機唔好食太耐！
白玉丸子對日本人嚟講質地硬咗少少，但味道有陣陣糯米香，如果再軟糯番啲就完美喇！底層嘅生果味道跟抹茶雪糕唔太夾，食落感覺好奇怪。
小評：
| 雪糕味道：3.5 | 雪糕質感：3 |
| 配 料：3 | 份 量： 4 |
| 賣 相：4 | 總 分：17.5 分 |
京林屋
地址：銅鑼灣軒尼詩道 500 號希慎廣場 6 樓 603-604 號舖
電話：3580 1838
營業時間：星期日至四 11:30am-10pm，星期五、六及公眾假期前夕 11:30am-10:30pm
【飲食優惠】
京林屋抹茶甜品 限時買一送一
最近着陸！│辻利茶舖│18 分
最新登陸香港的日本抹茶店；「辻利茶舖」係日本抹茶界中歷史最悠久的老字號之一，今年 11 月初正式落戶中環 IFC 開設外賣店。始創人辻利右衛門於 1860 年喺京都經營茶舖，以最高等級嘅綠茶「玉露」而聞名於世。到 1923 年，辻利喺北福岡小倉市開設首家分店，並開始製作抹茶甜點。老字號傳至第 7 代傳人辻史郎，品牌的蹤跡傳至倫敦、多倫多、墨爾本及台灣等地。雪糕於店中即製，其餘材料如高級抹茶、白玉、紅豆蓉、焙茶忌廉、沖繩黑糖漿等都是日本直送，keep 住日本嘅抹茶味。
雪糕新地 $68
日本朋友都覺得賣相好日本 feel！新地用膠杯載住，可以清楚睇到每一層的食材，影相出嚟都靚啲！新地有脆米、抹茶雪糕啫喱、自家製紅豆蓉及抹茶雪糕 4 層， 最頂加多粒白玉、抹茶啫喱及花形窩夫三文治。
抹茶軟雪糕用北海道 8.0 牛奶製，不過質地幼滑但無想象中濃郁。雪糕嘅抹茶味突出，但無乜回甘味，而且奶味略為太搶。
抹茶啫喱嘅茶味相對濃厚，味濃但唔苦澀，質地 Q 彈！中間嘅紅豆好有驚喜，咬到粒粒紅豆，甜度雖然較高但同雪糕又好平衡。
脆米烘得好脆有香濃烘焙味道，但味太濃蓋過抹茶雪糕味。而原本是茶盒形狀窩夫三文治，但而家變咗花形，就連入面啲豆蓉餡都變做忌廉。
小評：
| 雪糕味道：3 | 雪糕質感：4 |
| 配 料：3 | 份 量：3 |
| 賣 相：5 | 總 分：18 分 |
辻利茶舖香港店
地址：中環港景街 1 號國際金融中心商場 3012 號舖
電話︰從缺
營業時間：11am - 9:30pm
facebook：
Tsujiri Hong Kong
【詳盡報道】
終於嚟喇！辻利茶舖 ifc 插旗
抹茶控大熱之選│Via Tokyo│20 分
Via Tokyo 係綠茶控至愛，銅鑼灣店門前長期大排長龍。由日本人 Kosei 開設，上年於尖沙咀開分店，最近推出 $78 tea set 吸客，淨係睇價錢已經引死人！Kosei 對抹茶甜品嘅要求好高，選用京都宇治抹茶粉與北海道 3.6 牛乳製作，抹茶雪糕茶味幽香，即使唔係百年老字號都有大批粉絲，咪就係咁解囉！
宇治抹茶焙茶芭菲 $55
抹茶軟雪糕的色澤翠綠，用北海道 3.6 牛乳製作，乳脂充足好 creamy，質感軟滑。抹茶味澎湃有回甘，茶香悠長，於口腔久而不散。
蕨餅由京都入口的蕨餅粉製作，食落口感非常煙韌，唔似啫喱咁帶爽爽口感。蕨餅的抹茶味甘香，表面的抹茶粉不會苦澀，不過得一粒真係太少。
兩位日本朋友一食即刻大叫「好好食」、「好日本呀」，「好日本」，即係質感軟糯唔糊口，仲有陣陣糯米香。
小評：
| 雪糕味道：5 | 雪糕質感：5 |
| 配 料：4 | 份 量：3 |
| 賣 相：3 | 總 分：20 分 |
Via Tokyo
地址：尖沙咀金馬倫道 29 號地下
電話：2385 6388
營業時間：星期日至四 12nn-11pm，星期五及六 12nn-11:30pm
【抹茶狂熱】
韓粉注意！O'SULLOC 出抹茶朱古力
抹茶熱潮始作俑者│中村藤吉│17.5 分
講起抹茶，如果唔識中村藤吉嘅話，無資格自稱抹茶控！呢間京都抹茶老字號，於上年登陸香港後，將抹茶熱推到峰，到而家都未見跌勢！「中村藤吉」於 1854 年成立，多年來已成為京都的旅遊點。香港人好幸福，今年茶室搬大咗、等候時間縮短咗。更開設外賣店，想食雪糕、刨冰，甚至歎返杯茶都唔再等到頸都長！
抹茶軟雪糕 $53
雪糕以膠杯戴住，材料層層疊、層次分明，賣相好吸引。底層佔一半是脆米，頂層再有約 4 圍半抹茶軟雪糕，再加埋自家製紅豆蓉及白玉丸子。唔鍾意膠杯，可轉用窩夫筒。窩夫筒脆脆又帶牛油香，令雪糕嘅味道更多變。
軟雪糕有點點抹茶粉，以為抹茶味好濃厚，但試過發現茶味輕柔淡雅，但味道過甜少了回甘，幸好雪糕不易融化。紅豆略為過甜，搶走抹茶味。
佔咗一半分量的脆米，size 比較大粒，淨食脆米的話會食到淡淡的焦香。不過與抹茶雪糕混埋一齊食之後，脆米味道即時被蓋過，而且變濕後失去脆口感。
小評：
| 雪糕味道：3 | 雪糕質感：3 |
| 配 料：2.5 | 份 量：5 |
| 賣 相：4 | 總 分：17.5 分 |
中村藤吉
中村藤吉香港店 Next
地址︰尖沙咀彌敦道 118 號美麗華商場 Miramall 地下 G06 號
電話：2426 6111
營業時間：11am-10pm
【特式主題】
聖誕食！Kawaii 小紅帽甜品
總評：Via Tokyo 勝！
一日走勻 4 間抹茶雪糕專門店，可以即時比較到 4 間抹茶雪糕的味道。經過 4 小時的抹茶雪糕之旅，總結日本及香港人的口味，揀出 Via Tokyo 成為全場總冠軍！抹茶味非常突出又帶回甘，質地 creamy，甜度恰到好處。就連白玉丸子及蕨餅都做到日本味，白玉丸子 Q 軟、蕨餅煙韌，食盡軟、脆、煙韌口感，好有層次。
文：Jessie 攝：Ray
【零食放送】
麥維他壓扁咗！變身榛子 / 焦糖棒棒
【精選放題】
雞翼控揮手區！1.5 小時任食 12 款雞翼
【得意小食】
法國 LU x 吉百利 朱古力夾心餅
歡迎你 like 我哋 U Food Facebook Page / U Food Instagram ，取得我哋更新更快嘅資訊！
