海鮮街新力軍
鴨脷洲大街上，三幾步路就有食小菜、海鮮的店子，新開的「小炒皇」無懼加入戰團，靠的是小炒名店的大廚班底。全店 5 個師傅，4 個是從長沙灣人氣食店「大中華飯店」過檔的，包括大廚Alex，他入廚十多年，一直專注做中菜，特別以小炒最耍家，新店同兄弟拍住上，一埋位就有晒隊形。
大廚從名店過檔，自然能嘗到不少名菜，像即燒 BB 豬、鐵板黑椒豬手、招牌臘味煲仔飯，加上招牌小炒皇、啫啫 XO 芥蘭煲，惹味又夠鑊氣，前兩者更是大菜，小店罕見。他們又搞搞新意思，創出芝士焗扇貝、秘製濟公爽肉煲等，短短時日，已儲落一批熟客。
熟客以街坊為主，區外客也陸續摸上門，無他，客人愛它小菜夠鑊氣，選擇多又唔貴，Alex 說價錢跟附近食店相若，只是定位做小炒，形象會鮮明些。用心做，也是他們的殺着，「小炒皇」就用上韭菜、靚蝦乾，見師傅埋鑊，灼韭菜花、炸銀魚仔及蝦乾、快炒各款材料等，過程如行雲流水，話咁快就煮好。食客也不怠慢，就趁鑊氣最澎湃的一刻起筷，試問點會唔好食？店子只做晚市，但開到凌晨 2 點，更設宵夜特價時段，擺明吸引夜鬼幫襯。
小炒皇
地址：鴨脷洲大街 119-121 號地下
電話：2552 6638
名店跨區插旗
橫看豎看，新開的「龍圖閣海鮮飯店」都不似小炒店，地方大，座位闊落，坐得舒服。這店其實就是西環有名的「張仔海鮮美食館」的復活版。從前，張仔海鮮美食館做街坊生意，主打海鮮、小炒，出名到連明星都幫襯，但位置吊腳，座位狹迫，老闆們於是尋找新舖，物色到這裏，便將樓面、廚房原班人馬帶過來。易了名、換了新裝，但人事沒變，菜式也大同小異。用料依然嚴謹，肉類是新鮮貨，精選走地雞，環球海鮮像花蛤王、蟶子王、龍蝦、花蟹及花尾躉等，日日來貨，好鮮活！
推介「高湯胡椒鹹菜浸花蛤王」，花蛤用胡椒、鹹菜、高湯烹調，特別鮮甜，墊底的粉絲索盡精華，好食！籠仔荷葉糯米蒸花蟹，花蟹肉爽甜，生炒糯米飯粒粒分明，軟硬適中。愛鑊氣的，則必食江南一大炒、XO 醬西蘭花爆花枝拼桂花蚌。
食物足料夠火候，環境又比以前舒適，但菜式平均售價竟比舊店平上 10 -15%，點解？老闆 Martin 話初到尖沙咀開業，都想薄利多銷益食客，海鮮更是明碼實價，不怕被時價嚇窒。特別一提，午市好抵食，最平 $38 起，飯、麵仲包湯或飲品，及免收茶芥加一，明益打工仔。
龍圖閣海鮮飯店
地址：尖沙咀漆咸道南 17-19 號帝后廣場 1 樓
電話：2817 1671
私房菜大伙頭撑場
大廚吳永皓幾年前在錦田紅磚屋開私房菜館「紅廚」，大賣紮實傳統手工菜，竟能令容納三十多人的小店，吸引本地傳媒、台灣電視台及新加坡媒體來採訪，好威水！今番私房菜搬到長沙灣，背後是另一個故事。
「這間舖本來是我朋友的茶餐廳，但人流少，生意唔多好，就叫我過來幫手。」吳師傅說。他即時將紅廚結束，走到福榮街，不過茶記生意無起色，最後決定重操故業，再做私房菜。門面雖仍是茶記模樣，但內裏已經變身，掛上竹簾、字畫對聯，優雅得多，地方比錦田店闊落，可容納多一倍客，菜式數目更勝從前。私房菜全日供應，最少一日前預訂，九道菜每位 $200 起（兩位起），不收茶芥免加一，均均真真。
吳師傅雖有幫手，但一夫當關做伙頭，絕無欺場，數客家菜、粵菜最拿手，亦有京川滬菜式，超多選擇。一道桂花素翅即見真章，炒得乾身，條條分明；醬爆豬雜極有鑊氣，粉腸有嚼勁，豬腰爽脆，質感豐富。招牌菜尚有紅燒圓蹄、古法胡椒豬肚雞等，味道有驚喜。
紅廚（鴻發餐廳小廚）
地址：長沙灣福榮街 542 號地下
電話：9094 0584
(原文摘自《U Magazine》文：Pam 圖：Suki、基、Jay)
