元朗達人Machael帶路尋美食

元朗第一醉雞麵

Michael 在元朗的搵食鐵竇，最高紀錄係一個星期吃足 4、5 次，更帶過 Paco 同泳兒來食，最癲係經常同幾個為食麻甩仔來，吃完買埋外賣，一餐竟然吃掉過千元。甚麼原因這店的醉雞麵可以迷倒這個嘴刁大肥仔，Michael 說：「淨係佢用新鮮雞，個朕雞味已經與眾不同，仲要雞皮滑溜唔肥，又浸得有酒香、無酒苦味，好味到好多上海菜館的醉雞都要行埋一邊。佢個雞湯用大量雞殼煲，啖湯好清甜。」這醉雞用鹽水加花雕浸，浸得酒香入味，老闆說好味的秘密在於花雕落少少就夠，酒香芬芳而不濁、不嗆喉。老闆推介最好食胸背、 Michael 則獨愛超滑雞髀位，食時將雞汁晒落湯度，雞香更爆燈。每份醉雞更有雞肝雞腎墊底，肝爽脆到爆又有酒香，難怪 Michael 說他每次最少來兩碗。

爽爽麵店
地址：鳳攸北街 2 - 6 號順豐大廈地下
電話：2477 4988

全港茶霸 靚奶茶

成街茶記都有奶茶賣，但 Michael 入到元朗一定飲呢間。「呢度嘅奶茶茶味好香，茶味與奶味夠平衡，質地夠順喉，而且唔會甜到牙都痺惹痰，所以我成日揸車來歎返杯。」這杯奶茶大有來頭，它是「2009 年全港金茶王大賽」冠軍，店子未紅之前 Michael 已經幫襯。這杯奶茶可以跑贏太興等名店係有原因的，配方已三代，別家一般只用 3、4 隻茶葉，大發更考究地用足 10 種，而且款款都是斯里蘭卡葉，茶香夠複雜夠細膩，更有齊香味與滑度，成本亦超高。仲要花時間撞茶 8 次，讓茶底出味又唔嚡口，加番 2 分黑白奶，近年真係好少飲到咁順喉的奶茶。Michael 叫大家要叫「茶走」，甜度同茶香特別夾。

大發餐廳
地址：洪水橋翠珊園地下 5 號舖（輕鐵洪水橋站對面）
電話：2443 5533

鹹香鹽焗雞飯

「呢度的鹽焗雞真係可以將鹽的鹹香味焗到入雞身，雞皮同雞肉難得帶肥，而且有雞味，記住試埋個配鹽焗雞的辣醬，用嚟撈飯真一流。」Michael's Comment

東江飯店
地址：元朗教育路 88 號地下
電話：2477 5510

全港唯一潮州腸粉

腸粉食得多，潮州傳統腸粉食過未？此店主打潮式腸粉，開業半年已在元朗闖出名堂，連藝人金剛及小儀拍美食節目睇都要山長水遠入去食。

潮州腸粉形狀似足 Pizza ，每份都是即叫即蒸的，不能像廣東腸粉般叫貨返來翻熱，吃起來熱辣辣、唔會腍 pat-pat。做潮州腸粉手工一定唔慳得，米漿是整個食物的靈魂，店主自家用東北粘米磨，此米由鄉下用到而家，做出來的腸粉皮煙韌有米味，還有自己用上湯、五香粉及藥材推了個惹味醬汁來配腸粉，唔似做廣東腸粉加醬就食得咁容易。腸粉連料入爐蒸熟，火候控制得差一點就會變成食粉團。招牌蠔仔腸粉吃來腸粉夠滑、蠔仔又鮮又爆汁，為這一口，千里迢迢入來都值得。

潮式腸粉
地址：鳳翔路 69 號建輝大廈地 下 5 號舖
電話：2418 9638

古早味 廣州瀨粉

廣州瀨粉你可能唔曉，但一講「狗仔粉」，三張開外的人士一定食過。不過，連發源地廣州都剩番幾個檔口做，香港就更難食到。唔好將它跟坊間以上海麵加豬油渣湯的「偽粉仔」混為一談，因為它是真正「瀨」出來的粉，同其他重視爽口的粉麵不同，此粉食其軟糯滑溜的口感，軟糯的質地因為麵條的粉團加了白飯，麵條澱粉比例高，放入湯煮時會釋出澱粉膠質，令口感更滑。放到豬油渣上湯中煨足一小時，煮得更腍更入味，似足 30 年前的車仔檔狗仔粉個朕味，配上蝦米、蛋絲、豬皮、鯪魚餅及土魷絲，記住加辣菜脯，是現代的豪華升呢版。

西關粥品
地址：西菁街 23 號富達廣場 118 號地下
電話：6348 9641

後街炭火煲仔飯

此店的炭火煲仔飯好食過唔少名店，皆因店主馮太好鬼有心，煲仔飯好似做畀仔女食咁講究，煲煲都是放在炭爐上將生米煮成熟飯，無花巧但火候控制得一流，米飯出奇地有味，她用泰國米，貪其無咁索水，用炭火煮好後粒粒企身，最勁近煲邊的米飯都成了不硬、不會燶如炭屎的飯焦，入口煙煙韌韌，市區「流爆」的無飯焦的煲仔飯比下去。雖然礙於成本用「冰鮮雞」，但做出來一樣皮嫩肉滑兼有雞味，手勢到家，其他口味如排骨、肉餅、牛肉都用新鮮貨，就算熱辣辣的夏天，星期六日一樣大把 fans 來排隊吃。

味仟店
地址：安興街 40 號地下安輝樓 5B - C 舖
電話：2449 3962

阿一都食 客家茶粿

繼老婆餅後，茶粿絕對是元朗特產，但街邊檔買婆仔茶粿不是太油膩，就是粿皮太硬唔夠滑。

這個由正宗客家大廚做的茶粿，連名廚楊貫一都鍾意食，原因好簡單，師傅做粿皮的工夫實在到家，他特別加了粿皮的筋度，雖然有一定厚度，但口感卻如糯米皮般煙韌，一拉即斷；餡料則是蘿蔔絲、蝦米及菜脯兜香，蘿蔔無渣又有甜甜的蘿蔔汁，無苦味。皮餡合一， 吃來有濕潤感，唔會好似食粉團般。加上棄用蕉葉用更有香氣的糭葉蒸，打開籠蓋，飄來糭葉香和蘿蔔香，聞到已經想食。

自家人酒家
地址：大馬路 123 號開心廣場 9 樓
電話：2479 1886

加料粥油砂鍋粥

落元朗宵夜食粥，以前一味只有新記，但這間新開的潮州店，專賣牛肉，估唔到做粥都有一手。它們做的是潮州粥，唔似廣東粥般爆米夠綿，反而多了份滑溜無口的「粥油」。粥油其實係煲粥時隔去米飯所剩返的米漿，米味都喺晒粥油度，最黏最滑。要潮州粥有濃郁的粥油，方法好簡單，就係加重米的分量煲出更多粥油，明明 4 人用的粥，水份不變但落足 6 人分量的東北珍珠米去煲，米被煲開時再隔走 2/3 的米渣，只要粥油，啖粥又點會唔滑唔濃味？更跟足傳統潮州人做粥的方法，加牛骨湯、麻蝦同魚露添味，啖粥有米味之餘，仲有海味鹹香味，正到暈！

華桂潮州牛肉店
地址：建業街 51-53 號地舖
電話：2475 3872

食神韜冬菇亭西多士

這冬菇亭多士食神韜由細食到大，韜哥跟老闆識了幾廿年，若然他在元朗三點三搵食，一定柯打一份。單係西多士上台那朕撲埋來的濃郁蛋香，加上切開又鬆鬆軟軟，其他茶記拍馬追唔上，留意下西多士的形態你就知點解，原來上下兩塊麵包是老闆特登費時用半煎炸的方式煮出來，麵包逐塊煎，煎時油份永遠唔過包面，加上又用新油，所以比放落萬年油裏炸的西多，形狀更工整，不會炸到乾爭爭，亦不會被萬年油的膉味蓋過蛋味。老闆女兒說他們用新鮮麵包和質素高的雞蛋，所以才有這種蛋香和鬆軟，試過口感與蛋味真係好 amazing！

強記西苑咖啡食店
地址：元朗大棠道熟食街市 C7 舖
電話：2476 3988

(原文摘自《U Magazine》文：Sieg 圖：Paul、Suki、May、Sky、Jay、Jayce)