Cafe人語

Coffee Team 全城最型

蒲 Cafe ，看人是很主要的部分。這間 caffè HABITU 新開的精品 Line，唔止咖啡講究咗，成間舖都好鬼型，連人都特別型英帥靚正。

「我哋間 Cafe，第一件事就係要型！睇吓老闆諗到用件牛仔背心做制服，其餘交畀同事們自己配搭，Coffee Team 醒目四正以外，行出嚟仲要有個性先至合格，唔想佢地變做木口木面的樣辦店員。好似 Head Barista Sum 咁，佢特登起咖啡機上面放咗個十字架，因為佢係虔誠基督徒，我哋好歡迎佢哋將工作間私人化，做起嘢嚟會起勁啲！」 Bruno說。(Business Development Manager)

連咖啡都做得型過人，淨係將部意大利名牌 La Marzocco Linea 咖啡機改咗個透明的防彈玻璃外殼，已經型到痺；加埋舖頭將烘焙界的林寶堅尼，價值 50 萬元的超級大型的德國 Probat 烘焙機放埋喺度，專業烘焙師 Ben 日炒夜炒，唔講以為去咗約紐 Brooklyn 的 Local roaster。連沖法都時尚過人，用連 MoMA (紐約近代美術館) 永久珍藏品的簡約木製 Chemex 咖啡壺做 Hand Drip，又玩埋連陳豪都躍躍欲試的 Aeropress，配單一咖啡豆。

豆自己炒，有坦桑尼亞、埃賽俄比亞 Sidamo 及耶加雪夫、巴西、印尼 Wahana、Niganara 等 20 多種單一品咖啡豆；又有自家拼配、在世界權威咖啡網站 Coffee Review 中取得 92 分、用 8 種不同產地咖啡豆拼成的 Classico No.3 做招牌，豆大部分都屬 Grade 1 或 2 AA 級，好高質素，豆暫時只供店內使用。

不過，更型係由選配生豆開始為客人做 Customized Roasting，由靚仔 Bruno 主理，事前會畀份 multiple choices 你做，剔吓你平日鍾意玩咩運動、聽甚麼音樂、Favorite colour 係咩等等，似心理測驗多過問卷調查，他說測驗暗藏你對咖啡口味信息，幾鬼型！加埋這裏提供 Casual 得嚟幾 Fine 的 High Tea、三文治、火腿、Tapas 及意粉等菜式，遲吓又有酒賣，好快會做咗型人基地！

The Coffee Academics
地址：銅鑼灣耀華街 38 號地下
電話：2156 0313

幸福小婦人 街角Cafe

梭椏道不及勝利道煩囂，靜靜的沒有吵鬧的人潮，在這裏的街角就有一間跟旁邊洗衣店、寵物店格格不入的 Cozy cafe，像光速般轉換場景，帶去你到紅葉落索的加拿大。老闆娘 Vivienne 人如其店，年輕富親和力。

「在加拿大生活多年，返來香港覺得這裏好快，香港生活是好，但有時好想有一個小角落似返溫哥華的 Reading club 人慢落嚟，加上自己又鍾意整嘢食，心想何不開一間 Cafe。要人們感受到慢，最緊要做到閒適的氣氛，所以我唔擺咁多枱凳，花好多錢都要做個英式窗台同兩排落地玻璃，嘻嘻！真心講呢度同我心目中的完美 Cafe 相差唔遠，有少少 dream come true 的感覺！呢間 Cafe 仲令我覺得自己好幸福，籌備和裝修這半年完全感受到老公的全力 support，夜晚唔開心又有佢幫我做心理輔導；一開聲，細佬就飛越大半個地球來這裏當 3 個月咖啡師，生意好都唔及有兩個人咁錫我的人喺身邊咁開心。」Vivienne 說。

甜品由老闆娘一手包辨，有啫喱 x Tiramisu 的變種版，又有 Pesto x Scone，配合秋天做個核桃南瓜蛋糕，睇心情做甜品無連鎖店咁公式化，食物如 All day Breakfast、意粉、沙律、意粉、薄餅及意大利飯等則交由廚師負責，新鮮加自製醬汁，誠意度高，加埋她與店員超親切的笑容，蛇一蛇真好！

The Squirrel Coffee and Kitchen
地址：何文田梭椏道 8 號榮英大廈地下
電話：2668 5008

兄弟班 20 something

一班 20 多歲的年輕人聚在一起，喂威圍多過實際，但呢班 friend 過打 band 的 Kidult，唔單止在尖沙咀開咗第一間 Cafe Our Wonderland，一做就是 9 年，舊年還開分店，幾個月前還被邀請為這間 playful 的 Cafe 當創作團隊，20 something 真係掂。

「搞 Cafe，無嗌過交就呃你，但合作咗咁多年，我哋唔會忘記 Work hard 因為想 Play hard，所以唔會因為工作傷和氣，又唔會有階級，唔會對人只會對事，最緊要 happy。咁啱成班人好啱 Channel，做嘢又一齊、玩又一齊，一早有晒默契，個個星期都要食飯吹水、過時過節要燒嘢食才先安樂，可以話係間 Cafe 將我哋聚起嚟。你叫我哋老老正正搞餐廳，唔係後生仔 Style，我哋鍾意鬼馬啲，成個浴缸放喺尖沙咀舖、廁所畫滿 Graffiti 我哋都夠膽，咁先做到 Chill out place 的精神，呢間黐住老闆個 Design studio，一於搞 Simple is the best 的設計味，咁先至潮嘛！」Peter x Eric說。

這間新店，賣的東西好簡單，吃的盡是 Kidult 愛好的口味，呢幾年好 hit 的 All Day Breakfast、漢堡包、沙律、肉醬意粉及甜品，十數款菜式貴精不貴，配料醬汁一律 Homemade，配杯意大利老牌咖啡，唔使像吃 fine dining 般拘束假正經！

Perfect Day
地址：觀塘鴻圖道 81 號 5 樓 A 室
電話：2389 9554

(原文摘自《U Magazine》文： sieg、圖： 鑫、Suki)