佐敦深夜食堂

日本住家 深宵酒館

今年除夕，必 Check in 這間真實版的「深夜食堂」。這店唔似那些豪裝的居酒居，牆上的浮世繪、榻榻米坐墊、餐牌裏的燒酎插圖和動畫 EVA 的收藏品等等……，都是店主 Kelvin 親手繪、親手放置，沒有市儈味道，而且由 bar tender，到廚師到樓面都由他與日本籍太太一手包辦，間或會見到他的年幼子女在店內玩耍，好有家庭 feel。

店主自言想將東京鄰里 feel 的個性小酒館搬嚟香港，所以店內賣的清酒都是他飲過且鍾愛的，部分清酒香港無得賣，是他拜託日本的親友一枝枝寄過來，比較特別有「開明」，此酒釀好後會放入木桶貯放 5 年熟成，米味比一般新製清酒更醇；也入了近期日本居酒屋勁 hit 的赤免馬，是少數酒味與辛味 balance 的清酒。另外也賣日本人 daily use 的燒酎，有米、麥及芋釀的，燒酎飲法特別，有店主用咖啡豆浸的，也有加入和歌山梅和讓客人自行加入自己榨的西柚汁幾種飲法。

店主想突出 Sake bar 主題，只加了約 10 款適合佐酒的食物，有從岳母取來 recipe 的住家風炸雞、有日本酒吧大熱的味噌芝士及地中海風的烤海蝦，也跟足日本人酒後會吃個麵或者飯的傳統，推出茶漬飯及掛烏冬，倒數完去幫襯就當自己短暫去咗日本玩。

Ome Ome 日本清酒吧
地址：佐敦山林道 46-48 號運通商業大廈地下 G20-27 號舖
電話：2736 9906

罕見銅煲 夜魚粥

三更半夜食碗熱辣辣的生滾粥，感覺好似正氣啲，無咁 guilty，倒數後去這間喺佐敦的隱世明星店一定無錯，大太監黎耀祥同關二哥唯唯都好鍾意嚟。老闆是「魚米之鄉」新會人，擅長做魚粥，他做生滾粥無比認真，粥底用了膠質重的東北大米同有米香的泰國金仙米熬，唔會加生粉或糯米令粥底更稠身；還加了瑤柱、鹹瘦肉、腐竹白果㷛，煮到有膠質，唔會米還米，水還水，即係我哋平日講嘅「綿」，而且真係有瑤柱鮮味又有米香，唔似連鎖粥店啲粥粥味咁 flat。
嚟這裏一定要吃魚粥，魚每天新鮮交來，魚肉滑又鮮甜，唔會似死魚般肉都霉晒，加上這裏用銅煲生滾，粥料快速煮到夠火路，又唔使係咁攪住煲粥生晒水，無論係魚腩、魚卜、豬膶同黑柏葉這些易煮到嚡的配料，質地都啱啱好，尤以豬膶嫩滑最見功夫，難怪這店連續三年獲米芝蓮「必比登人」推介。

和味生滾粥
地址：佐敦吳松街 75 號
電話：2783 0935

(原文摘自《U Magazine》文：sieg、圖：May、Ki、Kam、Jay、lamlam)