隱蔽抵食 鬼佬茶餐
地點正，食物仲正，由鬼佬嘢、到好馬拉、或好港式的美食都有，平均消費都係 $30 - $50，水平同中上環好多地踎格嘅茶記差唔多，但食物分量、賣相、味道、同坐得舒服度都四正好多，圖中見到的食物係平常賣相，唔係為拍攝特登整，好有誠意。
鎮店四寶係辛辣麵餐、熱狗、魚柳包同喇沙，辛辣麵用番正品貨，湯水分量唔會沖到個味淡晒，連麵也淥得彈牙，辛辣到食完會冒汗，加埋唔孤寒用厚切餐肉，坊間薄切切的餐肉麵點比？喇沙跟番馬拉人傳統，有齊油麵同米粉，喇沙湯略稠又夠海鮮味。熱狗最癲，條法蘭克福腸成 12 吋長，即係等如吞把間尺下肚；魚柳魚唔係用袋裝雪藏炸魚柳，反而用龍脷肉再加英式 fish n chip 的蛋漿炸，同快餐店賣的好唔同，性價比超高，記者真心推。
Deli-O
地址：上環干諾道中 168-200 號信德中心 2 樓 268A 號舖
電話：2517 7696
上樓閒情室
茶是重點，Sinmei 從事中國茶批發 7 年，她又鍾意四圍走去搜羅靚茶，剛剛就去了越南和上海，店內的茶都高質素，好像烏龍就有武夷山大紅袍、福建鐵觀音、鳳凰山鳳凰單欉，紅茶有正山小種，還有普洱茶等，一系列以日本靜岡玉露綠茶配薄荷葉、白朱古力、豆奶或雪糕等的 Mojito、奶昔或 Latte，好多中上環 OL 超鍾意。
食物都有唔少茶的元素，特別是甜品，全都是老闆娘每早回來製作的，招牌作有綠茶蛋糕、蘋果批及綠茶忌廉曲奇，好受女士們歡迎；另一款不能不試的是豆腐漢堡，用有機鹽滷豆腐代替 heavy 的肉扒，夠蛋白質之餘又夠食唔會超飽，三點三食最啱；另有三文治、奄列等鹹食。店子剛剛開業一年，老闆娘特意將這年來具代表性的甜品做了個 high tea 盒子，兩位用仲配埋兩杯靚茶，價錢又合理，好鬼好 hea，嚟蛇記住預番一、兩粒鐘時間呀。
川善茶居
地址：上環永樂街 50 號昌盛大廈 5 樓
電話：3690 8238
(原文摘自《U Magazine》文：Snakeking、圖：May、Paul、Ki、Timmy、jay)
↓【限時搶⚡】MG Spirit西班牙清新水果酒！↓
↓ 獨特微醺體驗 / 西班牙釀製 / 天然新鮮果汁混合5.5%酒精伏特加！↓
↓【出Post賺現金賞】《社群》助您發展創作者事業↓
↓透過發佈帖文賺取收入！立即參加！↓
