近期有多間 new concept 的韓食店開業，想型又想吃韓菜首推試下呢間。
餐廳由在美國生活的韓國人 Chris 開設，舖頭概念來自紐約結合酒吧與餐廳的型格食店，有圖為證，入到去完全唔似韓國餐廳。Chris 將傳統的 BBQ 烤爐搬返入廚房，所有湯鍋、燒烤都唔使客人動手，全部由廚師代勞，一為廳面無油煙，二為免卻客人唔識搞、烤肉煮湯煮過晒龍的問題。
老闆走勻韓國多個地方，試了 10 幾個廚師的手勢才搵到現今的行政總廚，再聘了前 Cafe Deco 的副總廚朴智仙師傅來當大廚，她把西餐元素引進，食物款式 95% 以上是傳統的韓國美食，由主菜、煎餅、湯鍋、紫菜包飯、炸雞、燒烤、拌飯、石燒鍋飯、麵食及甜品都有，不過 presentation 就講究咗，似西菜，不像傳統菜般一撻醬汁放在菜式上面；其餘 10% 就是大廚的創意，她特別加了韓國餐廳少有的前菜及沙律，呢招極受細食 OL 歡迎。
餐廳內更設酒吧，飲前飲後都可以隊返一兩杯 cocktail，用餐享受絕對是以西餐廳做藍本，怕鬼咗坊間韓國料理老土宮廷氣氛，係時候換吓環境。
JANG
地址：中環皇后大道中 139 號 The L Place 18 樓
電話：2412 0002
摩登韓媽小食
韓國小食店就是迫狹油煙，但這店一改小食店的地踎形象，變成好似梨大附近的小 cafe 的模樣，而且唔止舖頭大變身，三位年輕的韓國時尚「阿珠媽」Laura、Sunny 及 Grace，將傳統小食變成輕怡版本，店內一樣有紫菜包飯、拌飯、韓式便當、炒粉絲、年糕及麵食賣，最特別是由三位女士創作的韓國版墨西哥卷 Korritto，將原版的粟米餅變成紫菜，中間加了飯，最重要全部都是減油減膩版本；另外煮菜最重要的辣醬及麻油都特別從韓國運來，辣醬用料天然，唔會鹽份過重；麻油更加了 Omega-3，兩者香港都無代理，是靠韓國供應商每星期一盒盒、一枝枝地運過來，加上大部分小吃都即叫即做，好新鮮，試過日賣 200 份紫菜包飯同 Korritto，就知附近的 OL 好鍾意吓！
K-Roll
地址：上環文咸東街 6 號順發樓地下
FUSION韓燒
雖然菜式賣相好韓國，但有唔少西式元素，暗中有 fusion 味。加入洋風，全因大廚兼老闆 Steve 在美國工作多年，他在美國德州的 Sheraton Hotel、Houston Country Club 工作，後者更是老布殊經常光顧餐廳，將西餐煮食的優點都加入韓菜之中，簡單如一道海鮮拉麵，牛湯底用上西餐煮洋葱湯的技巧，慢煮 2 天；又會用扒房常用的 Chuck Flap 做烤肉；骨子裏仍然用傳統做法，好像堅持以 Jumulleok (人手拌)的傳統方法醃肉，醃時又會好地道地加些真露；辣椒醬和多款配菜則每日鮮製，又會用梨肉攪爛做天然的「梨糖」，唔係用現成貨，所以唔使擔心 fusion 咗韓味唔生性。
Steve 更加了一些創作飲料及甜品，好似以韓國紅醋及乳酪調的韓式雞尾酒，還有用人蔘、紅棗跟蜜糖做雪糕。
水剌韓饍
地址：尖沙咀山林道山林中心 2 樓
電話：2711 7700
韓食拉麵CROSSOVER
韓國受日本文化影響甚甚，估唔到連新派餐廳都引進日本的元素，好似這店般，招牌作就是將平日我們在韓燒店吃到的高價烤牛肋骨，同日本拉麵結合，做法新鮮，而且價錢平咗，真係人人歡喜。拉麵以豚骨湯作湯底，雖然價錢相宜，但一樣用貴價的美國牛肋肉，貪其夠腍又夠牛味，醃製後烤香放到拉麵上，食落矜貴但荷包唔傷。
店裏有 full menu，湯、麵、鍋物、小食、醃菜等傳統的韓食都有，必吃韓式醃螄蚶同魷魚，不少旅韓人士都會專誠去首爾的漁市場吃，而家唔使坐飛機都食到。
韓登
地址：尖沙咀彌敦道 100 號 The ONE 4 樓 L408 號舖
電話：2111 9948
(原文摘自《U Magazine》文：Sieg、圖：Sky、Kee、Nova)
