街市直遞 火爆生滾粥

旺角真係多傳奇，這間有未夠 2pm 已賣完的生滾粥，仲勁到日本雜誌都有推介，不少日本遊客專誠上嚟幫襯，頗有穩世實力小店的況味。

小店由鐵皮檔起家，多年來咁受歡迎都係因為他們的生滾粥質素超高。難得舖頭在熟食中心，因利成便做到「街市直遞」，店內所用的鯇魚、豬肉及豬雜等都由街市運來，店三代阿東說新鮮度是游水鯇魚劏後 5 分鐘內就送到店，魚靚味道自然好。師傅刀功好勁，一條鯇魚在他手，可以起到只剩中間一條大骨而無細骨，魚片也超得超薄超透，生滾超滑超鮮；肉丸也是皇牌，因為丸裏的肥肉仍是人手刴，不讓機器攪爛晒啲纖維，每粒如珍寶珠的大小，鬆化鮮甜。

卅多年的煮粥功力都唔講得笑，呢度的魚腩粥咁出名，因為粥底真係煮出海鮮味，原來這店煲粥唔淨止用水，更自己多煲了一煲魚湯加落粥底度，魚湯用果皮、大地魚、白胡椒及薑等熬 2 小時，粥底則以越南絲苗米、豬骨、皮蛋及果皮溫火熬足 5 小時，米都爆開了，絲苗米的膠質煲晒出來又唔過分杰撻撻，起膠夠綿滑，更難得用銅煲高速令粥底滾起，配埋魚腩、肉丸及豬雜等，夠晒火候。

爽滑魚皮 $22
自家打鱗起肉，魚皮又薄又爽脆。

香滑腸粉 $13
腸粉挺身，不會蒸到又濕又腍，水平不俗，好多人叫嚟送粥。

秘製肉丸粥 $29
肉丸加了大頭菜及少量鯪魚膠，肥肉約有 3 成，煮熟後不硬反而鬆軟鮮甜。

鯇魚腩粥 $34
魚腩煮得爽滑，唔會煮到老晒，跟粥一起吃很綿又鮮味。

妹記生滾粥品
地址：旺角花園街街市 3 樓 12 號鋪
電話：2789 0198

(原文摘自《U Magazine》文：sieg、圖：Kee、Ki、Lamlam、Sky、Ken)