唔少前高官名人捧場的「老巴剎廚房」，近日響灣仔重開，有別於以前低調的面門，餐廳而家大左又靚左，仲有VIP房，坐得舒舒服服。新開餐牌暫時無大改動，一樣係老闆兼大廚鍾樹棠的拿手菜，水準依然。
必食當然係原煲上的去骨海南雞飯，嚴選本地鮮雞、泰國金鳳米，鍾師傅首創煲仔海南雞飯，唔止飯面鋪滿香茅、蒜頭及南薑，食到底仲有飯焦，好岩同朋友 share。醉酒花雕鵝肝亦出色，原件匈牙利鵝肝以低溫浸熟，再泡花雕及玫瑰露，軟綿如入口即化，齒頰留香。來幫襯咪淨係睇餐牌，查實鍾師傅好菜未能盡錄，普寧豆腐、獅頭鵝腸、大鮮魷及筍殼魚等都係 off menu，想食就訂位時問問啦。
去骨海南雞、原煲香草飯 $588
約 2 斤的原隻本地新鮮走地雞，肥美嫩滑，浸煮得剛好，上桌時連雞翼也起骨，啖啖肉。飯亦是亮點，泰國金鳳米以雞湯、香茅、蒜頭等烹調，一開蓋即香噴噴，用日本高溫陶瓷窩盛載，保溫一流，食到底更有香脆飯焦。可供 4-8 人用，須預訂。
醉酒花雕鵝肝、脆香餅 $138（半份）
原隻匈牙利鵝肝低溫慢煮後，浸冰水定型，再浸泡五年陳花雕、玫瑰露等一晚，既有醉人酒香，亦甘香豐腴，還比平日的煎鵝肝輕怡，配脆餅食一流。
麥皮蝦球 $188
新鮮海中蝦加牛油、鹹蛋黃烹調，加上幼細麥皮，最後再加粗粒麥皮，蝦球外皮微脆，鋪上麥皮口感豐富。
蘿蔔番茄中芹浸大花蟹 $1,300（時價）
這隻潮州大花蟹，跟平日做凍蟹的一樣，但煮法比吃原汁原味有更多層次，雞湯、番茄、蘿蔔、紅蘿蔔、中芹，跟大花蟹燴煮，蟹肉帶海水味，好鮮甜。啖湯更是精粹，喝個一滴不漏。
豬扒峇拉撈麵 $78（午餐）
午餐亦有好野食，豬扒炸得酥脆，麵條本地製造，少鹼水味，質感爽彈，拌以峇拉醬食，自家用蝦醬、馬拉盞、花生、蝦米和豬油爆香而成，好惹味。
普寧豆腐 $128
餐廳請來潮州菜師傅坐鎮，想食地道架忌冷風味都得，菜式都係off menu，師傅自己做豆腐，即使沒上粉蘸漿炸，也有脆皮效果，厲害，而且內裡嫩滑，豆味濃，沾點韮菜鹹水食，清爽。
餐廳重開，地方更寬敞，以淺色原木配湖水綠，簡約舒服。
老巴剎廚房
地址：灣仔交加里 32-38 號地舖
電話：2871 1993
地址：星期一至六12nn-2:30pm、6pm-10pm，星期日休息
原文摘自 U Magazine
