葵廣新店沒完沒了，最近 3 樓再辟出一角做食場，新食店暫時得 3 間，最吸睛係霸咗兩個舖位、大賣奶樽特飲及即製小食的五代同堂。原來甜品店已全結業，今次再開店，主攻小食，攻陷年輕人市場。負責人將糖水店的招牌作 keep 住，於葵廣繼續賣雞蛋布甸。原味布甸富蛋香、入口滑嘟嘟；朱古力味的布甸上加了朱古力粉，朱古力味 double up﹔仲有抹茶雞蛋同士多啤梨口味。
招牌雞蛋布甸之外，仲有一系列用玻璃奶樽載住的飲品！其中「一蝶檸檬酸」及「藍蝶地桃」仲用上泰國藍蝶花製作，再分別加上檸檬汁、桃味果汁及梳打，特飲分兩層唔同顏色，年輕人最 buy！中間的菠椰菠蘿蜜即是芒果加椰汁，以新鮮芒果打成蓉，味道自然。
原味雞蛋布甸、朱古力味雞蛋布甸 $12/ 隻、$20/ 兩隻、$50/6 隻
抹茶味雞蛋布甸、士多啤梨味雞蛋布甸 $12/隻、$20/兩隻、$50/6隻
（左起）一蝶檸檬酸、菠椰菠蘿蜜、藍蝶地桃 $20
巨芒冰冰（期間限定）$28
芒果甜品幾時都唔會 out！呢杯期間限定芒果特飲，用新鮮芒果肉打製成芒果汁，味濃唔酸。
葵廣小食店空間細，好多都只能夠將食物翻熱。但小店佔兩間舖位，仲有抽風設備，可以即場炸煮食物。
五代同堂 $56
呢個大堆頭小食杯，底層是自選飲品，頂層的小食拼盆有炸薯角、芝士春卷、炸洋蔥圈、一口西多等，豐富到足夠兩人 share。
LEGO 包 $25
店中有好多小食都是由幾位負責人親自製作，唔係拎來貨加工！好似呢個變奏版的台式棺材板，有柯打時炸麵包再即場加餡料。呢個係以 mozzarella、車打芝士與煙肉及番茄粒炒蛋，再配千島醬，好豐富！另外仲有吞拿魚加蜜桃、蟹柳沙律及香蒜洋蔥炒香腸薯仔粒等。
五代同糖
地址：葵涌廣場 3 樓 TOP 世界 3069-T16-17 號舖
營業時間：1pm-10:30pm
