去長沙灣「三郎麵燒屋」，位置有點僻，幾乎走漏眼，但，沒大街大巷的紛擾，自有一份寧靜，可慢條斯理食碗麵。
店名「三郎」，是指三位年輕店主，Ivan、Gino 及 Elvis，相識多年好朋友，創業頭炮竟是車仔麵 + 串燒，呢個組合聞所未聞。
「想創業好多年，諗來諗去最後決定做食店，自己屋企都做飲食（爸爸開設點心店），叫做有啲經驗。」Ivan 說。他原是幫手做點心，笑言好處是識到好多廚師前輩點。三人一致走大眾化路線，車仔麵頓成首選，但食店由朝開到晚，夜晚跟車仔麵似乎唔多啱feel，於是，喜歡飲酒的 Gino 就提議做串燒、燒物，日與夜得以順利連接，Gino 話：「兩樣加埋有啲似『瀨尿牛丸』，哈！」
講返車仔麵，湯底用豬骨及火腿煲幾小時，鮮甜得來帶鹹香，車仔餸近廿款，推介滷水美食，像雞蛋、豬大腸、雞翼尖及雞中翼，滷水味濃微甜，似瑞士汁，食物入味，全靠浸過夜。柱侯牛腩亦不錯，先用薑、柱侯醬炒香，再用腩汁炆腍，還有膠質豐富的牛筋。咖喱豬皮、咖喱魚蛋以自家炒咖喱醬煮，香味突出。湯麵以外，還新出百搭滷水撈，自選食物做滷水撈麵，三子真心推配丁麵，因為味道好夾。
另一邊廂的燒烤，也有心機，所有食物明火生燒，保留肉汁又燒得香噴噴，丸類肉類蔬菜海鮮有齊，連燒原隻龍蝦都有！龍蝦大大隻，先加點海鹽提鮮，還將蒜蓉混合牛油鋪面，肉質爽彈。
店子是全日供應車仔麵及燒物，因此食住燒龍蝦歎車仔麵不是夢，這裏還有生啤飲，盡興。
咖喱濃稠度適中，香味多於辛辣，配魚蛋或豬皮都不錯。豬紅實淨，不會一夾就散。
上排左至右
燒原條蒜蓉茄子 $24
茄子沒經拉油，由生燒至軟腍，蒜香味超濃，蔥粒清新，毫不油膩。
百搭滷水撈 $23/2 餸（出前一丁加 $2）
滷水沒死鹹，還帶微甜，似瑞士汁，拌丁麵吃一流。可自選心水餸。
黑椒豬頸肉 $14
豬頸肉以蔥油、蒜油及黑椒等醃味，沒燒到柴皮，外脆內爽彈。
下掛左至右
香草羊架 $30/件、$55/2件
蒙古羊羶味不算濃，經雜香草調味，更吸引。
自選兩餸麵 $23
豬大腸滷過夜，夠入味，牛腩不止有醬香，薑味亦突出，特別在粉麵上撒一撮櫻花蝦及蝦米，經熱湯一浸，香氣撲鼻。
燒厚隻龍蝦 時價
睇見就想食，龍蝦以海鹽、蒜蓉牛油燒香，肉質彈彈的不失鮮味。
滷水烏黑油亮，將豬大腸、雞中翼等浸過夜才夠味，配雞翼尖亦出色。
自家以咖喱粉、香葉、黃薑粉及椰奶等炒咖喱，用來煮豬皮及魚蛋。
秘製蝦油，放在枱上任舀，以櫻花蝦、蝦米、蔥油、蒜油及 X.O. 醬炒香，一放湯就知正。
布置簡約而不失型格，食車仔麵都可以坐得舒服。
串燒燒物全部生燒，沒取考，值得耐心等食。
三郎麵燒屋
地址：長沙灣保安道 401-405 號昌暉大廈地下 12 號舖
電話：3705 2161
營業時間：10am-2am
收費：只限現金，不設加一
交通：港鐵長沙灣站 C2 出口
泊車：保安道錶位
平均消費：$50
文章刊載自U Magazine
