熱愛優質生活

高難度! 傾斜倒插汽水沙冰

2017.05.18

在相機食先的年代,飲品唔單止要好飲,賣相仲要夠爆。呢幾杯飲品夠爆吧!其實玻璃樽裝維他奶和汽水公認比紙包和膠樽裝好飲,「香港地」再玩大啲,唔單止用來配沙冰,仲倒轉、傾斜再插進沙冰內奉客!這個 Style,似足以啤酒倒插入伏特加冰沙的韓式 cocktail 一樣,研發這飲品的大廚亦坦言靈感源自韓風飲品,推出大半年,一直大受歡迎。

點樣可以做到倒轉、固定又唔倒瀉?原來店方訂製咗一個膠托,放在杯子上承托着樽身,當然飲品分量要調校得啱啱好,先用 1/3 枝用來調製沙冰,餘下的用來倒插。以為好簡單,廚師們要經過不斷試驗、調校才做出這「高難度」動作。

飲品有 4 款,每款都配上味道搭調的沙冰。維他奶與紅豆冰是絕配;忌廉,當然是溝鮮奶沙冰才有懷舊 feel,加入呍呢嗱雪糕一齊打,香甜濃厚;芬達配鮮橙菠蘿沙冰,充滿夏日風情;雪碧則配檸檬士啤梨沙冰,仲食到粒粒果肉。一邊飲,在樽內的汽水不斷倒進杯內,飲極都仲有,飲品師傅話,一杯普通凍飲大約有 16 安士,呢杯倒立汽水 + 沙冰足 24 安士,抵飲啦!

倒插飲品的分量、角度和方法都經過耐心鑽研,才能做到不翻側、不滿瀉。

沙冰收到柯打才溝材料即打;當中紅豆沙冰以維他奶代替椰汁和忌廉,感覺較輕盈。

Page 1 of 2

歡迎你 like 我哋 U Food Facebook Page / U Food Instagram ,取得我哋更新更快嘅資訊!