出街打邊爐，火鍋套餐中包含新鮮海鮮往往加分不少！
近年不難發現不少火鍋店以海鮮作主打，佐敦上海街一間海鮮煲專門店「澳門台山水佬榮火鍋專家」就設計出「航母海鮮盛宴」。
長鍋中堆滿8款新鮮海鮮，一邊歎花甲、鮑魚、蟹等海產，一邊可以享用其他配料，相當豐富，推出一段短短時間已吸引不少海鮮迷潮聖，睇睇究竟抵唔抵食！
「航母海鮮盛宴」5:30pm開始供應，每位收費由$208起，每枱4位起。落單先首先選定湯底，推介招牌辣汁，分4種辣度，微辣湯底香而不嗆，惹味但不會掩蓋海鮮的鮮味。
套餐包括有8款時令海鮮，小編當日運氣好，可以食勻鮑魚、花蟹、大扇貝等較貴價的海鮮，另有花甲、螺、大蝦等等一共8款，不過Poster上包含的大蟶子就沒有供應了。怕吃不到心水海鮮，最好於訂座時查問清楚。
花蟹和蝦上枱時仍然生猛，即灼即食，倒熱湯時小心蝦「彈」起。蟹一人一隻，肉嫩軟滑，而且味道鮮甜，不過蟹膏就差一點點了；蝦非常新鮮，肉質有彈性，滲入辣汁，可無需蘸調味料。
大扇貝亦叫人驚喜，帶子肉飽滿；其他海產如花甲、蜆、螺得的沙吐得乾淨，每人每款大概有4-6隻；每鍋海鮮均以4款蔬菜墊底，如粟米、蕃茄、娃娃菜等，建議食到一半才享用，讓蔬菜有時間吸盡辣湯汁和海鮮的精華。
先食花甲、蝦等易熟海鮮，再吃鮑魚、花蟹，中途可加入套餐包含的5款自選火鍋料。安格斯肥牛雪花紋理分明，入口時油份慢慢化開，必點！
另外，手打丸的質素亦甚高，這款手打豬肉丸包裹着芋頭粒，軟綿綿，好味！響鈴味道一般，不夠新鮮香脆且較油。
「航母海鮮盛宴」整體豐富，海鮮新鮮而且選擇多輕易回本，美中不足的是套餐不包含飲品，想免費享用飲品（一大瓶），須於一日前訂座。另外，上菜速度較慢，也令火鍋套餐扣掉一點分數。
參考「航母海鮮盛宴」每位收費（用餐時間為2.5小時）：
星期日至四
5:30pm-9pm入座 - $238
9pm後入座 - $208
星期五、六、公眾假期及其前夕
5:30pm-10pm入座 - $268
10pm後入座 - $238
*另收加一
澳門台山水佬榮火鍋專家
地點:佐敦佐敦道37C佐敦中心3-4樓（注意，佐敦有兩間佐敦中心，在地圖上搜尋時請留意）
電話:2327-8282
文：HK港生活
