講起日本料理,係咪諗起壽司、刺身、天婦羅等菜式呢?不過日本料理又點只咁少,近年興起嘅「水產」熱,令以水產作招徠嘅日式居酒屋喺城中湧現,唔少海鮮迷因而大飽口福!
當中,位於尖沙咀諾士佛臺嘅九井水產就以正宗浜燒,保存最原始嘅海鮮味道作主打,另有多款如九井刺身杯、岩鹽燒魔鬼魚等令人食指大動嘅菜式,再加上店內大部份海鮮均由北海道函館朝市直送,一班海鮮迷聽到係咪都已經流哂口水呢?
浜燒海鮮拼盤(4人前)$1388
拼盤中嘅海鮮種類繁多,包括日本活白貝、活鮑魚、北海道帆立貝、日本活蠔、原隻波士頓龍蝦等,食材份量十足。上枱時每款海鮮仍然「蠢蠢欲動」緊,極之新鮮。現場更有專業師傅為你即烤即製,瀰漫一陣陣嘅烤香,剩係諗起都要吞番啖口水!
九井刺身杯 $128
單睇賣相就已經覺得極之精緻,杯內裝滿各式薄切刺身,另有青瓜粒、蕃茄、牛油果等時令蔬果,表面再撒上矜貴黑松露、和風汁等,入口酸爽開胃。而杯底更加鋪滿乾冰,上枱時縷縷輕煙,仙氣瀰漫嘅視覺享受,真係唔相機食先唔得。
炭燒活鰻魚 $138
同坊間嘅浦燒鰻魚唔同,九井嘅呢款炭燒鰻魚一律以活鰻魚入饌,咬落表面香脆,內裡juicy,而嗰陣淡淡嘅炭燒香,更令人胃口大開。
岩鹽燒魔鬼魚 $138
魔鬼魚都食得架咩?其實魔鬼魚除咗有觀賞價值外,更加蘊含豐富骨膠原,營養十足。至於呢款咁罕有嘅菜式,九井首先採用火山岩鹽醃魔鬼魚身,其後再將魚身燒到金黃香脆,食落去香脆可口,肉身軟滑。
而今 720ml/$680、殘響720ml/$3800、吻火720ml/$1380
店內同時亦供應十多款有名嘅清酒俾客人享用,當中包括被稱為清酒王級「十四代」接班人嘅「而今」、由福山雅治取名,以被磨至只餘米中心7%酒米釀造嘅「殘響」,仲有歷經3年低溫熟成嘅「吻火」等,配搭埋新鮮嘅浜燒海鮮簡直絕配!
九井水產
地址:尖沙咀諾士佛臺1號
電話:2602 2023
營業時間:12pm – 3pm、6pm – 11pm(週日至四)
12pm – 3pm、6pm – 11:30pm(週五至六)
資料提供:九井水產