冬菇亭向來給人的印象，都以供應港式小食和粉麵小炒居多；不過，大圍最近就有間食店一改「傳統」，於冬菇亭內開設日式料理餐廳，售賣價錢親民的日本菜。
位於大圍美林邨冬菇亭的壹級日本料理，店內設計簡約，保留冬菇亭原有設計，樓底極高，自然過透射環境夠光猛，但舒舒服服有冷氣歎。
店內食品款式頗多，由沙律小食、壽司刺身、串燒炸物，到魚生飯、拉麵及浜燒海鮮等都有供應，適合家庭或大班朋友聚餐。
午市時段，一碗魚生飯$35就有交易，加配小食也不超過$50，難怪開業短短一個月已吸引不少街坊幫襯。
價錢親民，食品質素又如何呢？睇睇6大人氣食品介紹：
1. 角切魚生飯（$35；午市限定）
午市套餐中最吸引的，非這份角切魚生飯莫屬！魚生（如三文魚）切粒，拌入青瓜、雞蛋、蟹子等食材，用料不少，啖啖鮮味，$35一碗計相當抵食！
另可追加沙律、螺肉、餃子等小食，每份$8。
2. 藍鰭腩蓉海膽爆丼（$288）
選用呑拿魚腩蓉部份，剁成蓉後口感幼細綿密，無筋，帶點點麻香，好味！
海膽則選用加拿大膽，肉厚身大片，入口順滑，但不算十分甘香。不過配搭三文魚子享肉，味道非常鮮甜，份量足，值得一食。
3. 浜燒海鮮（時價；約$328）
餐廳亦提供燒海鮮選擇，每日挑選時令海鮮，按款式收費，點餐前最好先向店員查詢。
當中原條魷魚筒厚肉味鮮，肉質彈牙，青口等急凍海鮮質素則平平。
4. 明太子手羽（$48）
雞翼釀入明太子，蔥味頗濃，外脆內嫩，小心爆汁。
5. 黑豚肉串（$18）
熱賣串燒之一，黑豚肉味較羶，不過質地未夠鬆化，略硬。
6. 牛舌串（$38）
厚燒牛舌夠多汁，肉嫩彈牙，好味！
壹級日本料理
地點:新界沙田大圍美林邨熟食亭1-4號
開放時間:12nn-2:45pm（午市）／5:30pm-11pm（晚市）
電話:2813-9368
文:HK港生活
