辛苦搵嚟志在食,放得入肚就梗係要有番咁上下質素啦!近排就發現咗灣仔灣景廳嘅自助餐性價比超高,呢期仲用緊「和牛海膽」做主題,搵嚟極級澳洲M6和牛同韓國海膽擔大旗,設計咗好多唔同口味嘅菜式,好似香蒜和牛配海膽焗珍寶元貝就已經夠晒睇頭,中西日韓式樣樣有齊,咁就鍾意點食都得啦~
大廚發功 融合創意與優質食材
今次自助餐用咗澳洲M6和牛同韓國海膽兩款頂級食材,大廚好用心咁將佢哋幻化成富各國風味嘅菜式,好似日式代表就有日式和牛他他配冷稻庭烏冬、中式就有海膽海皇蒸千葉豆腐;至於韓系美食就有韓式燉和牛牛肋骨,每樣都水準出眾;加埋回本必食嘅加拿大雪花蟹腳、新西蘭生蠔同翡翠螺等冰鎮海鮮冷盤,呢餐絕對係超班超值嘅選擇!
必食推介1:香蒜和牛配海膽焗珍寶元貝(每位1客)
識食嘅食客就知道澳洲M6和牛牛肩胛有幾巴閉喇!因為佢係每頭和牛只有2-3公斤嘅稀有部位,嫩滑得嚟又有嚼勁,牛味香濃,加埋用自家製海膽芝士醬焗製嘅日本珍寶元貝,甘香鮮甜,滋味一百分!
必食推介2:韓式燉和牛牛肋骨
以牛骨加入紅棗、蒜頭、大蔥同蘿蔔等熬足12小時先完成嘅牛骨濃湯,再將牛肋骨反覆以先燉後焗嘅方法煮2-3小時,濃郁嘅湯底完全滲入牛肋骨之中,令牛肋骨軟腍味濃,有入口即化嘅口感,一流!
必食推介3:海膽海皇蒸千葉豆腐
用韓國新鮮海膽煮成橙黃通透嘅芡汁,淋在刀工細膩又細緻嫩滑嘅豆腐薄片上,同珊瑚蚌、桂花蚌、鮮蝦、蜜豆等豐富食材配襯起嚟,口感層次豐富唔在講,絕對係一道色香味俱全嘅佳品呀~
其他推介:
日式和牛他他配冷稻庭烏冬及雜錦天婦羅
幼滑煙韌嘅冷稻庭烏冬與半熟和牛他他,沾上日式冷麵汁後,風味別具一格,尤其係滲透出大理石紋油花嘅和牛,滋味不凡;至於雜錦天婦羅就夠晒香口惹味,除咗一般海蝦、魚柳、冬菇等食材外,仲加入咗海膽芝士同櫻花蝦餅兩款新口味,直頭畀到你置身日本嘅感覺呀~
(上)香蕉拿破崙
(下)班蘭焦糖燉蛋
用新鮮班蘭葉榨汁後,混入法式燉蛋之中,焦糖香濃誘人,蛋奶香味與班蘭芳香出奇地合拍,嶄新口味令人驚喜。至於香蕉拿破崙口感鬆脆,吉士醬甜度得宜,同綿滑香蕉蓉組成完美味覺享受。
INFO
灣景廳
地址:香港灣仔港灣道4號灣景國際1樓
查詢:3909 9088 / 5721 2553 (WhatsApp)
「和牛海膽盛合」自助晚餐
供應日期由即日至2019年1月31日
免付加一優惠價
星期一至四:成人及長者 $418、小童 $338
星期五至日:成人及長者 $448、小童 $358(已包括加一服務費)*
*須於成功訂位當日起三天內預繳每位$100訂金
生日優惠
壽星全枱每位按免付加一優惠價再減$30
*須於成功訂位當日起三天內預繳每位$100訂金
*壽星須於入座時出示有效證明文件方可享生日優惠
餐飲優惠
每6位成人或長者惠顧可獲贈Tiger生啤2升(只限堂食)
價目及優惠不適用於2018年12月份及2019年1月1 日
圖片只供參考
資料由客戶提供